भांगरभूंय | प्रतिनिधी
भांगरभूंय । प्रतिनिधी
वाळपयः वाळपय ते ठाणे मजगतींच्या कोपर्डे हांगच्या रस्त्याच्या बांदकामाक बिरेस्तार 15 डिसेंबराक पर्येची आमदार दिव्या राणे हिचे हस्तुकी सुरवात करतले. पावसाच्या दिसांत हो रस्तो उदका पोंदा वता. ते खातीर ताची उंची वाडोवपाचो बांदकाम खात्याचो प्रस्ताव सरकारान मानून घेतला.
कोपर्डे हांगा पावसाचें उदक तुंबून रस्तो उदका पोंदा वता. ताका लागून येरादारी आडमेळे येतात. रस्तो उदका पोंदा वतगीर वाहनां कोपर्डें गांवांतल्यान व्हरचीं पडटात. पावसाचें उदक व्हांवन वचपाची वेवस्था नाशिल्ल्यान उदक रस्त्यार येवपाचो हो प्रकाप फाटल्या कांय वर्सां सावन सुरू आशिल्लो. रस्त्यार येवपी उदकाक वाट करून दिवपाचें काम नवो रस्तो बांदतना करतले. आमदार दिव्या राणे हिणे वाळपयच्या बांदकाम कार्यालयांतल्यान धाडिल्लो प्रस्ताव सरकारा कडल्यान मंजूर करून घेतलो. ह्या कामाक सुमार 47 लाख रुपया खर्च येतलो. हाचे फुडें कोपर्डें रस्त्यार पावसांत उदक येवप बंद जातलें.
बांदकाम खात्याच्या वाळपय कर्यालयांतलो अभियंतो देवेंद्र वेलिंगकार हांचे कडेन संपर्क सादलो तेन्ना रस्त्याक उंचाय दितगीर पावसात रस्यार उदक येवपाचें बंद जातलें अशें तांणी सांगलें. बिरेस्तार 15 डिसेंबराक रस्त्याच्या बांदकामाक सुरवात करतले. ह्या वेळार कोपर्डे पंचायत सरपंच सोमनाथकाळे, पंच वांगडी राधिका सावंत, सयाजी सावंत आनी हेर मानेस्त हाजीर रावतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.