भांगरभूंय | प्रतिनिधी
कर्नाटक, महाराष्टांत पडिल्ल्या उटंगाराच्या पावसाचो परिणाम; आवक देंवली
भांगरभूंय । प्रतिनिधी
पणजीः गोंयाक भाजयांची पुरवण करपी कर्नाटक आनी महाराष्ट्रांत कांय दिसां आदीं पडिल्ल्या उटंगाराच्या पावसाचो परिणाम गोंयाचेर जाला. कोथिंबीरीची जुडी चार पटीन म्हारग जाल्या, तशेंच हेर भाजयांचे दर दुपेटीन वाडल्यात.
हिसपा भायर पडिल्ल्या पावसाक लागून कांद्यांच्या पिकाचेंय लुकसाण जालां. ताका लागून कांदेंय म्हारग जावन गोंयकारांच्या बोल्साक आनीक कातर लागपाची शक्यताय आसा.
शेजारच्या कर्नाटक आनी महाराष्ट्र ह्या दोन राज्यांतल्यान गोंयांत व्हड प्रमाणांत भाजी येता. पूण ह्या दोनूय राज्यांनी फाटले कांय दीस उटंगाराचो पावस पडला. ताका लागून थंयच्या भाजयेच्या पिकांचें लुकसाण जालां. ताचो परिणम गोंयांत आयात जावपी भाजयांचेर जाला आनी तांचे दर दुपेटीन वाडल्यात. पावसाचो सगळ्यांत चड मार कोथिंबीरीक बसला. 20 रुपयांनी मेळपी कोथिंबीरीची जुडी सध्या पणजे बाजारांत 70 ते 80 रुपयांक विकतात.
बेळगांवी मार्केटांत कांद्याचो सांठो फावोशा प्रमाणांत आसा. ताका लागून कांद्याचे दर स्थीर आसात. पूण पावसाचो मार कांद्याच्या पिकाकूय बसला. ते भायर बेळगांवी मार्केटांतल्या कांद्याची आयात देंवल्या. ताका लागून दिवाळे उपरांत कांद्याचेय दर किलो फाटल्यान 100 रुपया वयर वचपाक शकतात, अशी म्हायती पणजी मार्केटांतल्या मौला देसाय ह्या भाजी विक्रेत्यान दिली. पणजी सयत विवीध बाजारांनी येवपी भाजयेची आवक फाटल्या कांय दिसां सावन देंवल्या. मागणी चड, पूण भाजी उणी आशिल्ल्यान दिसान दीस भाजी म्हारग जायत आसा. हे वाडिल्ले दर फुडले कांय दीस अशेंच उरतले, अशेंय देसाय हांणी सांगलें.
पणजेचे भाजयांचे दर (किला फाटल्यान रुपया)
टमाट 50, कोबी फ्लावर 50, कांदो 40, बटाट 40, भेंडे 80, हरवी मिरसांग 80, शिमला मिरसांग 80, गवार 80, गाजर 80, कोथिंबीर जुडी 70 ते 80, तवशें 60, कोबी 50, कोकण दुदी 60, दुदी 60, वालपापडी 40, कांद्याची पात 20 रुपया जुडी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
