भांगरभूंय | प्रतिनिधी
विजेची जोडणी दिवंक नाशिल्ल्याचें कारण उक्तडार
फोंडें: कोडार-बेतोड्यां कृशी खात्याची नव्यान बांदिल्ली इमारत उक्तावणा उपरांत लेगीत वापर नासतना तशीच पडून आसा. लाखांनी रुपया खर्च करून बांदिल्ले इमारतींत अजून विजेची जोडणी दिवंक नाशिल्ल्याचें कारण उक्तडार आयलां. फार्मांत नव्यान बांदिल्ले इमारतीचो योग्य वापर करपा खातीर कृशी खात्यान गंभीरताय लक्षांत घेवन इमारतींत कचेरी सुरू करपाची मागणी बागायतदारां कडल्यान जायत आसा.
कृशी खात्याच्या अधिकाऱ्यां खातीर कांय वर्सां पयलीं बांदिल्ले इमारतीचे कांय म्हयन्यां पयलीं कृशी मंत्री रवी नायक हांणी उक्तावण केल्लें. उक्तावणा उपरांत इमारत बंद अवस्थेंत उबी आसा. मेळिल्ले म्हायती प्रमाण इमारतीक अजून विजेची जोडणी दिल्ली ना. ताका लागून सरकारी फार्माची कचेरी अजून स्थलांतरीत केल्ली ना. वीज जोडणे खातीर कृशी खात्याचे अधिकारी सेगीत वीज खात्या कडेन फाटपुरवण करीत आसात. पूण वीज खात्यान अजून मेरेन इमारतीक वीज जोडणी दिवंक नाशिल्ल्यान अजाप उक्तायतात.
इमारतीत कचेरी सयत एक सभाघर बांदलां. कृशी खात्या वतीन जावपी विवीध शिबिरां सभाघरांत घेवपाची सुविधा उपलब्ध करून दिल्यात. फार्मांत तरणाट्यांक प्रशिक्षण दितात. नव्यान बांदिल्ले इमारतींत प्रशिक्षण दिवपाची बरी सोय तरणाट्यांक उपलब्ध जावंक शकता. कृशी मंत्री रवी नायक हांणी गंभीरतायेन लक्ष दिवन इमारतीक वीज जोडणी दिवची अशी मागणी फार्मांत येवपी बागायतदार करूंक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
