भांगरभूंय | प्रतिनिधी
-नुस्तेमारी वेपाऱ्यांची जातली नोंदणी, प्रक्रिया सुरू
पणजी : जेटींचेर नुस्तेमारी वेपाऱ्यां कडल्यान कोट्यांनी रुपयांची उलाढाल जाता. मात वेपाऱ्यांची सरकारा कडेन नोंदणी नाशिल्ल्यान वेव्हाराची कसलीच कागदोपत्री नोंद जायना. हाका लागून नुस्तेमारी वेपाऱ्यां कडल्यान सरकाराक शून्य येणावळ मेळटा. कितले नुस्तेमारी वेपारी आसात, हाचोय आंकडो सरकाराक खबर ना. नुस्तेमारी खात्याचे मंत्री निळकंठ हळर्णकार हांणीच हो प्रकार स्पश्ट केला.
नुस्तेमारी हो राज्याचो परंपरीक आनी मुखेल वेवसाय. हजारांनी लोक नुस्तेमारी करतात आनी उदरनिर्वाह चलयतात. ते भायर नुस्त्यांची विक्री जाता. नुस्तेमारी आनी नुस्तें विक्रीचेर लाखांनी लोकांक रोजगार मेळटा. ठोक नुस्त्यांची खरेदी करून ताची विक्रेत्यांक विक्री करपी हजारांनी वेपारी आसात. ह्या वेपाऱ्यांची सरकारा कडेन नोंद ना. दोन वर्सां पयली नुस्तेमारी खात्यान वेपाऱ्यांची नोंदणी सक्तीची केल्ली. तांकां वर्सुकीं 2 लाखांचें शुल्क बंधनकारक केल्लें. तरी लेगीत नुस्तेमारी खात्या कडेन एक वा दोन वेपाऱ्यांची नोंदणी आसा. हाका लागून शुल्क फारीक करपाचो प्रस्नूच येना. वेपाऱ्यांची नोंदणी जावपा सयत सरकाराक येणावळ येवची, हे खातीर सरकारान पावलां उखलपाक सुरवात केल्या.
नुस्तेमारी मंत्री निळकंठ हळर्णकार हांणी ही म्हायती दिली.
नुस्तेमारी वेपाऱ्यांची मंत्री हळर्णकार हांणी बसका घेतली. हे बसकेक अधिकारी हाजीर आशिल्ले. नुस्तेमारी वेपाऱ्यां विशीं खर निर्णय घेवपाचे सरकारान थारायलां. नुस्तेमारी वेपाऱ्यां खातीर नोंदणी सक्तीची आसतली. नोंदणी ना, जाल्यार वेपाऱ्यांक जेटीचेर प्रवेश मेळचो ना. तशेंच नुस्तेमारी वेपाऱ्यांक नोंदणी शुल्क भरचें पडटलें. शुल्क भरले उपरांत नोंदणी जातली. वेपाऱ्यां खातीर 2 लाख रुपया वर्सुकीं शुल्क आसा. ह्या शुल्कांत बदल जावप शक्य आसा. दिसपट्टे, म्हयन्याळे वा वर्सुकीं अशे तरेन शुल्काची आकारणी जातली. शुल्क तशेंच ताच्या कालावधी विशीं उपरांत निर्णय जातलो. नुस्तें वेपारी आनी सरकारा मदीं बसकांचें सत्र सुरू आसा. वेपाऱ्यांक विस्वासांत घेवन शुल्क थारतलें, अशें नुस्तेमारी खात्याचे मंत्री निळकंठ हळर्णकार हांणी सांगलें.
जेटींचेर सीसीटीव्ही कॅमेरे
नुस्तेमारी जेटींचेर कोट्यांनी रुपयांची उलाढाल जाता. सकाळच्या वेळार बरेच जाण जेटीचेर आसतात. सगळ्यांचेर नदर दवरपा खातीर सीसीटीव्ही कॅमेरे बसोवपाचो प्रस्ताव आसा. हाका लागून गैरवेव्हाराचेर नदर दवरप शक्य जातले. कांय दिसां पयलीं सरकारान मुखेल जेटी सील केल्ल्यो. आतां ह्यो जेटी उक्त्यो केल्यात. सीसीटीव्ही कॅमेरे बसोवपाची प्रक्रिया सुरू जाल्या, अशें नुस्तेमारी खात्याचे मंत्री निळकंठ हळर्णकार हांणी सांंगलां.
गस्ती खातीर भाड्याच्यो बोटी
बेकायदाे एलईडी नुस्तेमारी जावपा विशीं कागाळी आसात. एलईडी नुस्तेमारीचो ल्हान नुस्तेमाऱ्यांक फटको बसता. नुस्तेमारी खात्या कडेन सध्या गस्ती खातीर दोन बोटी आसात. दोन बोटी पावनात. आनीक बोटींची गरज आसा. नव्यो बोटी ये मेरेन गस्ती खातीर भाड्याच्यो बोटी घेतले. भाड्याच्यो बोटी घेवन एलईडी नुस्तेमारीचेर नदर दवरतले. जेटीचेर सीसीटीव्ही कॅमेऱ्यांक लागून लेगीत एलईडी नुस्तेमारी करप्यांची म्हायती मेळटली. मंत्री निळकंठ हळर्णकार हांणी ही म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
