भांगरभूंय | प्रतिनिधी
भांगरभूंय । पत्रक
पणजीः कोंकणी बगर गोंयकारपण आसपाकूच शकना, अशें हळदोण्याचो आमदार अॅड कार्लोस फेरेरा हांणी दाल्गादो कोंकणी अकादेमीच्या (डीकेए) संस्थापक दीस कार्यावळींत मुखेल सोयरो म्हणून उलयतना सांगलें. ह्या वेळार आदल्या कोंकणी लेखकांची म्हायती संकलीत केल्ल्या ‘रोमी कोंकणीतले सोर्गेस्त सॅवोक’ पुस्तकाचें प्रकाशन जालें. माचयेर तोमाझिन कार्दोज, एफ व्ही डिकॉस्ता आनी डीकेएचो अध्यक्ष व्हिन्सी काद्रूस, डॅनियल डिसोझा आशिल्ले.
कोंकणी आनी गोंय वेगळें करपाक जायना. म्हाका कोंकणीचो आनी गोंयचो मोग आसा. दरेका गोंयकारांक हो मोग आसल्यार कोंकणी सामकी वयर सरतली अशें फेरेरा हांणी फुडें सांगलें. पुस्तकाचें संपादन तोमाझिन कार्दोज, एफ डिकॉस्ता आनी काद्रूस हांणी केलां. वेगवेगळ्या लेखकांनी कोंकणीच्या आदल्या लेखकांची म्हायती दिल्या. दाल्गादो कोंकणीची स्थापणूक 1988 वर्सा जाल्ली तेन्नाच्यान तिच्या वावराचो तोमाझिन कार्दोज हांणी नियाळ घेतलो. सर्गेस्त फादर फ्रेडी डिकॉस्ता हांणी अकादेमीक दिल्ल्या सहकार्याची तांणी याद करून दिली.
कोंकणी मोगींनी ‘रोमी कोंकणीतले सोर्गेस्त सॅवोक’ पुस्तक विकतें घेवचें असो उलो एफ डिकॉस्ता हांणी मारलो. डीकेए अशे तरेचीं पुस्तकां प्रकाशीत करतली अशें तांणी सांगलें. रोमी कोंकणी गोंयांतल्या दरेका गांवांत पावोवपाचो अकादेमीचो यत्न आसा अशें काद्रूस हांणी सांगलें. ‘रोमी कोंकणीतले सोर्गेस्त सॅवोक’ पुस्काचें मोल 400 रुपया आसा. मात डीकेएच्या ऑफिसांत तें 40 टक्के सवलतीन मेळटलें अशें तांणी जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
