भांगरभूंय | प्रतिनिधी
एकाच दिसांत सगळ्यांत चड सात प्रयोग सादर
पणजी ः राजदीप नायक हांच्या कला चेतना वळवय संस्थेच्या ‘गांव जाला जाण्टो’ ह्या कोंकणी नाटकान एकाच दिसांत सगळ्यांत चड सात प्रयोग सादर करपाचो विश्वविक्रम केलो. ते प्रमाण ह्या नाटकाचे 7 प्रयोग काल, 18 मेक फोंडेंच्या राजीव गांधी कला मंदिरांत सकाळीं 7.30 ते 10.30 मेरेन सादर जाले.
तातूंत कलाकार राजदीप नायक, सुचिता नार्वेकार, राजेश लोहिया, सायली कुडतरकार, 5 वर्सां पिरायेची भूमि नायक नार्वेकार आनी हेर कलाकारांनी वांटो घेतिल्लो. हें नाटक कला चेतना वळवय हे संस्थेन आयोजीत केल्लें. ह्या नाटकाचो विक्रम ‘वर्ल्ड रेकॉर्ड बुक्स ऑफ इंडिया’ नोंद जातलो. आदलो विश्वविक्रम मराठी नाटकाच्या नांवान आशिल्लो. तांणी मुंबयंत सलग स प्रयोग केल्ले.
पयलो प्रयोग सकाळीं 7.30 वरांचेर सुरू जाल्लो. हे नाटक दोन वरांचे आशिल्लें. अर्द वर उपरांत फुडलो प्रयोग सुरू जाल्लो. निमाणो प्रयोग रातच्या 10.30 वरांचेर सुरू जालो आनी रातच्या 12.30 वरांचेर सोंपलो. दरेक नाट्य प्रयोगाक नाट्य रसिकांनी उत्स्फूर्त प्रतिसाद दिलो.
म्हादय न्हंयेच्या संवर्धनाचे संदेश
ह्या नाटकांत म्हादय न्हंयचे देगेर आशिल्ल्या गांवांचो, सैमाकडेन तांचो संबंद, शारीकरणाक लागून खंडीत जावपी समाजीक जिणे पद्दत ह्या विशयांचेर भर दिलां. म्हादय न्हंय व्हांवप बंद जाल्यार सगळें सोंपतलें असो संदेश नाटकांतल्यान दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
