कोंकणी नाटकाचो संवसारीक विक्रम

भांगरभूंय | प्रतिनिधी

‘गांव जाला जाण्टो’ नाटकाचे फाटोफाट सात प्रयोग

भांगरभूंय । प्रतिनिधी
पणजीः राजदीप नायक हांच्या कला चेतना वळवय संस्थेच्या ‘गांव जाला जाण्टो’ ह्या कोंकणी नाटकान एकाच दिसांत सगळ्यांत चड सात प्रयोग सादर करपाचो विश्वविक्रम केलो. ते प्रमाण ह्या नाटकाचे 7 प्रयोग, 18 मेक फोंडेंच्या राजीव गांधी कला मंदिरांत सकाळीं 7.30 ते 12.30 मेरेन जाले. सेगीत 7 प्रयोग करपी गाव जाला जाण्टो हें संवसारातलें पयलें कोंकणी नाटक म्हूण नोंद जालां, अशें वर्ल्ड रेकॉर्ड ग्रुप ऑफ इंडीयाच्या अधिकाऱ्यांनी जाहीर केलें.
ह्या विश्वविक्रमा विशीं अदीक म्हायती दिवपा खातीर कला चेतना वळवय हांणी पणजे पत्रकार परिशद घडोवन हाडली. ह्या वेळार वर्ल्ड रेकॉर्ड ग्रुप ऑफ इंडीया मुंबयचे संजय नार्वेकार आनी सुशमा तांबडकार, नाटकाचे निर्माते राजदीप नायक, बसोवपी अमोघ बुडकूले, मुखेल अभिनेतो निरव नायक, मुखेल अभिनेत्री प्रशांती च्यारी, कलाकार रामानंद नायक, राजेश परेरा, भुमी नायक, बरोवपी सुचिता नार्वेकार आनी खेळाचे वेवस्थापन करपी एन्कोर एक्सपिर्यन्सिसची सायली कुडतरकार हाजीर आशिल्लीं.
ह्या वेळार उलयतना सुषमा तांबडकार हिणे सांगलें, ‘गांव जाला जाण्टो’ ह्या नाटकाचे सात प्रयोग सकाळीं 7.30 ते रातचे 12.30 वरां मेरेन सोगीत एकाच सुवातेर एकाच पंगडाक घेवन करप हो संसारातलो पयलो विश्वविक्रम पयलेच खेप एक कोंकणी नाटकान रचलो. हाचे पयलीं पोरूं मुंबय मराठी नाटकान फाटोफाट स प्रयोग सादर केल्ले.
मराठी रंगभुमीचेर हे सारकिल्ले बरेच विश्वविक्रम जाल्यात. पूण सेगीत सात प्रयोग कोंकणी नाटकात करपी कला चेतना वळवय हे पयले मानकरी जावन आसा. हे नाटक फकत मनरिजवणच न्हय तर सामाजीक संदेश लेगीत दितां, अशें तांबडकार हिणें सांगलें.
5 वर्सां पिरायेच्या भूमी नायक हिणें सगळ्या प्रयोगांत काम केलां. आताची ल्हान भुरग्यांची पिळगी मोबायल आनी सोशल मिडीया भितर गुंतिल्ली आसता आनी नाट्य मळार ती कमीच दिसता. पूण हे ल्हान चलयेन नाटकात रातच्या खेळा मेरेन काय न्ही कशी आपली कला सादर केली, अशें तांबडकार हिणें सांगलें.
काटेकोर यत्न घेत आमी दोन वरां भितर नाटक पुराय करून दुसरो शो सुरू जावचे पयली फकत अर्द वरांचो विसव घेवन एक मिनीट लेगीत व्हगडावंकना. सकाळच्या 7.30 वरांच्या प्रयोगाक 400 लोक आशिल्ले, मदलो प्रयोग 800 परस चड प्रेक्षकांचे हाजरीत हावसफूल्ल आशिल्लो आनी रातच्या निमाण्या प्रयोगात 450 लोक आशिल्लो, अशीं म्हायती नाटकाचे निर्माते राजदीप नायक हांणी दिली.
हे शक्य करून हाडपी ओनकोर एक्सपिरयन्सीस ही इव्हेंट मेनेजमेंट कंपनी, आमका जोडपालव दिवपी कला आनी संस्कृती खातें, महाराष्ट्रवादी गोमन्तक पक्ष आनी गोवा फॉरवर्ड पक्ष हांणी अर्थीक मजत दिली. लोकांनी सगळ्या प्रयोगांक बरो प्रतिसाद दिलो तांचें उपकार मानतां, अशें नायक हांणी म्हणलें.