भांगरभूंय | प्रतिनिधी
पणजी: ३५० वर्सां पयलीं कोंकणी नागरी लिपींत बरयिल्लें प्रमाणपत्र हें कोंकणीच्या गिरेस्तकायेची गवाय दिताच. वांगडा वनस्पत आनी वैजकी शास्त्रांतूय मूळ गोंयकार आदीं सावन कशे फिशाल आशिल्ले हाची वळख घडयता, म्हणपाचें पोरणावळ अभ्यासक आनी पुराभिलेख उपसंचालक डॉ. बालाजी शणै हाणीं सांगलें.
‘होर्तस इंडिकस मलबारिकस’ ह्या वैजकी नदरेन म्हत्वाच्या आशिल्ल्या वनस्पतींची सचित्र म्हायती दिवपी ग्रंथांत तीन कोंकणी वैजांनी योगदान दिलां. तांणी वखदी वनस्पतीची म्हायती कोंकणींतल्या नदिल्या. ते मूळ गोंयकार, केरळांत वचून स्थायीक जाल्ले. नागरी लिपयेंत दिल्ल्या ह्या प्रमाणपत्राक ३५० वर्सां जाल्यांत, म्हणून गोवा कोंकणी अकादेमीन घडोवन हाडिल्ले खाशेले कार्यावळींत डाॅ. शणै उलयताले. तांच्या हस्तुकीं तिगूय वैजांचे आनी कोंकणींत बरयिल्ल्या मूळ प्रमाणपत्राच्या तसबिरींचें अनावरण जालें.
ह्या वेळार प्राध्यापक डॉ. भूषण भावे हांणी हॉर्तस मलबारकुरस ग्रंथा विशीं खोलायेन म्हायती दिवपी पावर पॉयंटा वरवीं दिली. नव्या संशोधकांनी आनीकय अगत्यान वावर करून कोंकणीचें आदलें दायज लोकां मुखार हाडचें अशें मागलें.
सुरवातेक अकादेमीचे अध्यक्ष वसंत भगवंत सावंत हांणी येवकार दितना त्या काळारूय गोंयच्यान स्थलांतरीत जाल्ल्या ह्या तिगूय वैजांनी आपले भाशेचो अभिमान बाळगिलो म्हणपाचो दिश्टावो ह्या प्रमाण पत्रांतल्यान जाता अशें सांगलें.
अकादेमीचे सचीव पराग नगर्सेकार हांणी उपकार मानले. सुत्रसंचालन संशोधन सहाय्यक दत्तराज नायक हांणी केलें. हे कार्यावळीक पोरणावळ खात्याचे कर्मचारी, विद्यार्थी आनी कोंकणी लेखक व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
