कोंकणीचो नीज भक्त : तारकिनो दे सौजा

भांगरभूंय | प्रतिनिधी

वास्कू शारांत रावपी आनी फाटलो थोडो काळ घरांतूच आशिल्लो, कोंकणीचे रोमी लिपीच्या मळावेलो 30 -40 वर्सां आदलो नांवाजतो बरोवपी, तारकिनो दे सौजा, 71 वर्सां पिरायेचेर, आगस्ताचे 16 वेर देवाधीन जालो आनी कोंकणी मोग्यांक बरेंच दुख्ख जालें.  तो दाल्गादो कोंकणी आकादेमीचो भौव आदलो सर्वकाळ वांगडी आशिल्लो. ताणें केल्ले रोमी लिपी कोंकणीचे सेवेची आनी वावराची दखल घेतले बगर रावंक जावंचें ना.

तारकिनो दे सौजाची आनी आमची वळख खूब पोरणी, पूण चडशें प्रत्यक्ष भेटप जायनाशिल्लें. ताचीं बरपां ‘उजवाड’, ‘वावराड्यांचो इश्ट’, ‘गुलाब’ अश्या साबार नेमाळ्यांचेर वाचूंक मेळटालीं आनी तीं भोव रुचीन वाचपी लोक आशिल्ले. आयच्या काळार आसात तसलीं साधनां नासतनाय ताणीं कोंकणीची सेवा केली, हे पासत कोंकणी बरोवपी म्हूण ताची वळख आशिल्ली. तारकिनो बाब कोंकणीचे उमेदीन वावुरतालो आनी कोंकणीक सदांच विस्वाशी आशिल्लो. वास्कूचे इगर्जेक ताणें सेवा दिल्या आनी तिच्या नेमाळ्याचेरूय तो बरयतालो हेंवूय तितलेंच म्हत्वाचें.

कोंकणीच्या खऱ्या आनी नीज भक्ताच्या मरणाक लागून पुराय कोंकणी मळार एक रितेपण आयलां, जाचो त्या काळावेल्या आज जिवे आशिल्ल्या कोंकणी बरोवप्यांक थाव मेळटलो.  तो एक खाल्तो बरोवपी आशिल्लो. देखून मान-सन्मानां पासून सदां पयसूच रावलो.  हांव दाल्गादो कोंकणी अकादेमीचो चिटणीस आसतना आमी ताचे फुड्यांत गेल्ले आनी ताचो भोवमान करुंक चिंतिल्लें, पूण त्या वेळार ताणें मानून घेतलें ना. उपरांत, दोन वर्सां आदीं हांव अध्यक्ष जातच परतून ताचे कडेन संपर्क सादलो.  ताची भलायकी इतली बरी नाशिल्ल्यान आनी कोवीड पिडेक लागून ताणें परत एक पावटीं न्हयकार दिलो.  ही खबर आमी समाजीक माध्यमांचेर घालूंक ना. हाचो फायदो काडीत कांय जणांनी बेश्टेच आरोप केले.  देखून दाल्गादो कोंकणी अकादेमीचे वावुरपी समितीचो वांगडी दानियेल दे सौजा हाचे मार्फत परतून एक पावटीं भोवमानाची प्रक्रिया सुरू केली.  सुमार 7- 8 म्हयने हो वेव्हार चल्लो तरी आमी फळादीक जाले नांत.

कुवेत नोकरी करतना पासून कोंकणी भाशेची सेवा केल्ल्या तारकिनो बाबाच्या आत्म्याक आमी शांती आनी सर्गीचें सूख फावो करुंक मागतात आनी ताचें दुख्ख सोंसूंक ताचे घरकान्नीक आनी भुरग्यांक बुजवण पाठयतात.

– विन्सी क्वाद्रूस

9822587498