भांगरभूंय | प्रतिनिधी
भांगरभूंय। प्रतिनिधी
पणजीः दाबोळी हांगच्या केशव स्मृती उच्च माध्यमीक विद्यालायचो प्राचार्य शंकर गांवकार हाका विद्यालय वेवस्थापनान सोमाराक निलंबीत केलो. एके मशिदींत केशव स्मृती आनी बायणांतल्या सरकारी उच्च माध्यमीक विद्यालयांतल्या बिगर मुस्लिम विद्यार्थ्यांक हिजाब आनी मुस्लिम धर्मिक रिती रिवाजांची म्हायती दितात ताचे फोटो प्रसिद्ध जाल्या उपरांत विश्व हिंदू परिशद आनी हेर हिंदुत्त्ववादी संघटनानी निशेद केल्या उपरांत वेवस्थापनान ताकतिकेन कारवाय करून गांवकार हाका निलंबीत करपाचो निर्णय घेतलो.
मेळिल्ले म्हायती प्रमाण फाटल्या शेनवारा व्हो प्रकार घडलो. प्राचार्य गांवकार हाणे ‘इस्लामिक स्टुडंट ऑर्गनायजेशन’ हाचे कडल्यान आयिल्ल्या पत्रा वरवीं कार्यशाळेचो एक वांटो म्हणून विद्यार्थ्याक मशिदींत व्हेलें. थंय कांय विद्यार्थिनी हिजाब घालतना तशेंच विद्यार्थी वुझू करतना दिसले. विश्व हिंदू परिशदेन सोमाराक हे घडणुकेचो निशेध करून प्राचार्याच्या निलंबनाची मागणी केली. मशिदींत बायलांक वचपाक मनाय आसतना हिंदू चलयांक मशिदींत कशें व्हेलें असो प्रश्न विश्व हिंदू परिशदेच्या मुरगांव तालुको फाट्याचे सचीव संजीव कोरगांवकार हाणे केला.
कर्नाटक आनी उत्तर प्रदेशा उपरांत गोंयांतूय शांतताय आनी एकचार इबाडपाचो व्हो यत्न आशिल्ल्याचो आरोप हिंदूत्त्ववादी संघटनांनी केला. हिंदू विद्यार्थिनीक मशिदींत व्हरून तांका हिजाब घालपा खातीर प्रेरीत केलां असो आरोप करून ह्या संघटनांनी सोमाराक सकाळीं विद्यालया सामकार आंदोलन केलें. शाळा वेवस्थापनात ताकतिकेन प्रा. शंकर गांवकार हाका निलंबीत केलें.
‘इस्लामिक स्टुडंट ऑर्गनायजेशन’ हे संघटनेन आयोजीत केल्ले कार्यशाळेंत चलयांनी हिजाब घालपा संबंदीची म्हायती दिताले. कार्यशाळे संबंदी शिक्षण खात्यान कसलेंच परिपत्रक काडूं नाशिल्लें. व्हो प्रकार म्हणल्यार शालेय जिहाद आसा असो आरोप विश्व हिंदू परिशदेन केला.
हिजाब प्रकार उक्ताडार आयल्या उपरांत विश्व हिंदू परिशदे सयत हेर हिंदुत्तवादी संघटनांनी सोमाराक सकाळी विद्यालया कडेन जमून हे विशीं जाब विचारलो. ते उपरांत शाळा वेवस्थापनान प्राचार्याचेर निलंबनाची कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
