केशव सेवा साधनाचो वावर कवतुकाचो

सांस्कृतीक कार्यावळ सादर करतना विशेश भुरगीं. (विशांत वझे)

भांगरभूंय | प्रतिनिधी

शेखर सरदेसायः दिवचले विशेश भुरग्यांचे शाळेचें स्नेहसंमेलन उमेदीन

भांगरभूंय । प्रतिनिधी

दिवचलः समाजांत दरेकल्याक अडचण ही आसतातूच. कितल्याशाच लोकांक मुळाव्यो सुविधाय मेळनात. चड करून गांवगिऱ्या वाठारांत रावपी लोकांची जीण खुबूच त्रासाची आसता. आपली विशेश गरज आशिल्ल्या भावांचोय तातूंत आस्पाव आसा. अशा लोकांच्या जिवितांत उमेद हाडून, समाजांत अभिमानान जगपाक उर्बा दिवपी संस्था म्हणल्यार केशव सेवा साधना ही संस्था. समाजांत संवेदनशिलता वाडोवचे खातीर हे संस्थेन म्हत्वाचें योगदान दिलां. समाजान सदळ हातान हे संस्थे वांगडा रावून एक परिपूर्ण समाज घडोवचे खातीर आदार करचो, असो उलो कायनेको ग्रुपाचे संस्थापक शेखर सरदेसाय हांणी मारलो.

दिवचलेच्या केशव सेवा साधना विशेश भुरग्यांचे शाळेच्या स्नेहसंमेलना निमतान आयोजीत कार्यावळींत सरदेसाय उलयताले. ह्या वेळार तांचे वांगडा माचयेर दिनार म्हाड्डोळकार, केशव सेवा साधना संस्थेचे कार्यवाह लक्ष्मण बेहेरे, शाळेचे अध्यक्ष सागर शेट्ये आनी शाळेची मुख्याध्यापक संजना प्रभुदेसाय हाजीर आशिल्ली.

दिनार म्हाड्डोळकार हांणी सांगलें, समाजांत बऱ्यापणाची ताक वाडोवचे खातीर सज्जनशक्तीन सक्रीय जावचें. आपले भोंवतणी ज्यो ज्यो व्यक्ती, संस्था, संघटणां काम करतात, तांचे कडेन जुडचें. समाजांतलो एकादो उणाव आपले नदरेक पडटा जाल्यार आपूण लेगीत फुडाकार घेवन तो पयस करचे खातीर वावर करचो. केशव सेवा साधना विशेश भुरग्यांचे शाळेंतले विद्यार्थी, पालक हांकां अभिमान दिसचो अशी ही संस्था.

ह्या वेळार उल्लेख करपा सारकी कामगिरी केल्ल्या वेंचीक विद्यार्थी आनी पालकांचो मानेस्तां हस्तुकीं भोवमान केलो.

लक्ष्मण बेहेरे हांणी प्रास्तावीक केलें. शिक्षक ओंकार केळकार आनी सीमा निंबाळकार हांणी सुत्रसंचालन केलें. सागर शेट्ये हांणी उपकार मानले. ते उपरांत जाल्ले सांस्कृतीक कार्यावळींत तांणी नाटक, नाच, गायन, वादन सादर केलें.