भांगरभूंय | प्रतिनिधी
थळाव्या लोकांचो दावो; नगराध्यक्षा कडेन केली खोलायेन चर्चा
भांगरभूंय । प्रतिनिधी
केपें: केपें पालिका वाठारांतल्या गांवकारवाड्यार बेकायदो तरेन केल्ल्या प्लॉटांक भौशीक बांदकाम खात्याच्या उदका पुरवण विभागा वतीन नळ जोडणी दितात. हे खातीर गांवकारवाडो, देवसा, तळकट्टा, इग्रामळ वाठारांतल्या लोकांनी पालिकेंत एकठांय येवन मुख्याधिकाऱ्यांक जाब विचारपाचो यत्न केलो. मात मुख्याधिकारी हाजीर नाशिल्ल्यान त्या लोकांनी नगराध्यक्ष सुचिता शिरवयकार हांचे कडेन चर्चा केली. ते उपरांत नगराध्यक्षान लोकांच्यो समस्या समजून घेतल्यो आनी भौशीक बांदकाम खात्याच्या उदका पुरवण विभागाच्या अधिकाऱ्यां कडेन फोना वयल्यान संपर्क करून पुराय म्हायती समजून घेतली.
हे चर्चे वेळार अधिकाऱ्यांनी नगराध्यक्ष शिरवयकार हांकां सांगलें, उदका पुरवण विभागा वतीन कोणाकूच नळ जोडणी दिवंक ना आनी ते नदरेन कामूय सुरू करूंक ना. पूण एका मनशान नळ जोडणी दिवची अशें निदेवन दिलां. ज्या वाठारांतल्यान उदकाची पायपलायन वता त्या वाठारांतल्या सगळ्या जमीन धनयांचे ना हरकत दाखले हाडचे, अशें ताका सांगलां.
ही म्हायती लोकांक दिले उपरांत नगराध्यक्षान तांची समजूत काडली. तशेंच ह्या प्रकरणांत पालिकेचो कसलोच संबंद ना. हे संबंदांत उदका पुरवण विभागा कडेन पत्रवेव्हार करचो, अशें नगराध्यक्ष शिरवयकार हांणी सुचयलें. मजगतीं, भौशीक बांदकाम मंत्री निलेश काब्राल हांणी कांय दिसां आदीं केप्यां जनता दरबार घेतिल्लो. तातूंत तांणी लोकांच्यो समस्या आनी गाराणीं आयकून घेतिल्ली. त्या वेळार तांणी बेकायदो कामाक उर्बा दीवं नाकात, अशी शिटकावणी अधिकाऱ्यांक दिल्ली. तशेंच थळाव्यांचें हीत जपपाचो उलोय मारिल्लो.
फुडारांत उदकाचो उणाव जावपाची शक्यताय
गांवकारवाड्यार एके कडेन लाखांनी मिटरां वयर बेकायदो तरेन जमनीचे प्लॉट तयार केल्या. तें विकल्यात अशीय चर्चा विधानसभेंत जाल्ली. तेच जमनीचेर हे आदीं एक सरकारी प्रकल्प लेगीत हाडपाचो प्रस्ताव आशिल्लो. मात ताका विरोध जाल्ल्यान ती जमीन विकिल्ली. तशेंच हे जमनी विशींचें प्रकरण न्यायालयांत आसात. मात अचकीत त्याच वाठारांतल्यान एकल्यान नवीन पायपलायन जोडपाचें काम सुरू केल्ल्यान लोकां खातीर घातिल्ले पायपलायनींतल्यान ताका जोडणी दिवपाचें यत्न चलिल्ल्याचें थळाव्या लोकांचें नदरेक आयलें. ही जोडणी दिली दिल्यार देवसा, गांवकारवाडो ह्या वाठारांतल्या लोकांक उदकाचो उणाव जावपाक शकता. कारण थंय 150 परस अदीक प्लॉट आशिल्ल्यान लोकवस्ती वाडपाची शक्यताय आसा. ताका लागून लोकांक फुडारांत उदकाची समस्या निर्माण जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
