भांगरभूंय | प्रतिनिधी
केपें: कोठंबी केप्यां 7 सप्टेंबराक सकाळीं स्कूल बस आनी दुचाकी मदीं जाल्ल्या अपघातांत दुचाकी चालक जेसवर्ड मार्टिन्स (18) हाका मरण आयलें.
बुधवारा सकाळीं अवडेंचे एके शाळेची बस विद्यार्थ्यांक हाडचे खातीर वताली. कोठंबी वचपी रस्तो आनी असोळणे वचपी रस्तो आशिल्ल्या वोल्ताचेर मुखा वयल्यान येवपी दुचाकी चालकाचो ताबो सुटिल्ल्यान स्कूल बशीचेर धपको मारलो. ह्या अपघातांत दुचाकी चालक जेसर्वड मार्टिन्स हाका मरण आयलें, अशी म्हायती केपें पुलिसांनी दिली. मेळिल्ले म्हायती प्रमाण जेसर्वड चांदर सावन सकाळीं अवड्यां जिमांत वतालो, तेन्ना हो अपघात जालो. हे घडणुकेची म्हायती मेळटाच केपें पुलीस घडणुकेचे थळाचेर गेले आनी पंचनामो करून कूड पोस्टमार्टमा खातीर धाडली. हे घडणुकेचो पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
