भांगरभूंय | प्रतिनिधी
स्वताचेर वा कुटुंबाचेर संकश्ट कोसळ्ळें काय अडचणींत आयिल्लो मनीस सगले उपाय करता. तातूंत एक उपाय , देवस्पण. श्रद्धेन देव- देव केल्यार कोणाकूच हरकत घेवपाची गरज ना. मात, जेन्ना कांय लोक त्या अगतीक, आबूज मनशाचो गैरफायदो घेवन ताका कुड्डे श्रद्धेच्या कोंडांत ओडटात, तेन्ना तांचेर धर्म पळयनासतना खर टिका जावंक जाय. तांकां कडक ख्यास्त जावंक जाय. समाजान जागृत रावन लोक अंधश्रद्धेक बळी पडचे नात हें पळोवंक जाय. कारण अंधश्रद्धा ही अंधश्रद्धा, ती तुजी, ही म्हजी अशें नासता आनी तातूंत चडशे खेपे संबंदीत मनशाचें लुकसाणूच जाता. कांय वेळार जीव पसून वगडावचो पडटा. केरळांत काळ्या जादवाचो प्रकार घडला. तातूंत दोन बायलांची हत्या जाल्या. ही घडणूक उक्ताडार येवन सात दीस जाले. तातूंतली नविदाद म्हणल्यार आतां आनीक कांय लोक बेपत्ता आशिल्ल्याचें उक्ताडार आयलां. अर्थांत हातूंतल्या सगल्यांची हत्याच जाल्या अशें न्हय. पूण पुलीस ते नदरेन तपास करतात.
केरळांतल्या ह्या प्रकरणांत शफी नांवाचो मांत्रिक घुस्पला. ताणें भागवल सिंह आनी ताची घरकान्न लैला हांकां भरपूर धन मेळपाक जाय जाल्यार नरबळी दिवचो पडटलो, अशें सांगलें. ह्या जोडप्याक अर्थीक अडचण आशिल्ली, म्हणटकच तीं सोंपेपणी कुड्डे श्रद्धेचे भकीक पडलीं. तांणी तामिळनाडूंतल्या पद्मा (52) आनी केरळांतल्या रोझलीन वर्गीस (50) ह्या सोर्तीकार बायलांची हत्या केली. सगलें गुप्त धनाचे आशेन. एकली जुनांत तर दुसरी सप्टेंबरांत बेपत्ता जाल्ली. प्रकरण 11 आॅक्टोबराक उक्ताडार आयलें. फक्त नरबळीच न्हय मांस खावपा सारके अघोरी प्रकार आमकां करपाक लायले, अशी कबुली लैलान दिल्या. पुलिसांक तसो दुबाव आशिल्लोच. तो खरो थारलो. तिगांयकूय अटक जाल्या. आतां केरळांतल्या हेर जिल्ह्यांतल्या 25 वयर लोकांनी तांचीं घरचीं बेपत्ता आशिल्ल्याचे कागाळेचो परतून तपास करपाची मागणी केल्या. तांचो जर ह्या प्रकरणा कडेन संबंद आसा अशें सिद्ध जालें, तर हें प्रकरण पुराय केरळाक हालोवन उडयतलें, हें नक्की. नरबळी घडणुके आड कितें कृती केल्या, तो अहवाल राष्ट्रीय मनीस हक्क आयोगान केरळ सरकारा कडेन मागला. तेवटेन केरळांत कश्टाचीं कामां करपी साबार तामिळी लोक केरळ सोडून वचपाक लागल्यात. एके बातमे प्रमाण, केरळांतलीं भोवतेक कामां तामिळी, ओडिशी, बंगाली आनी झारखंडी लोक करतात. तांणी जर राज्य सोडलें जाल्यार केरळांतली समाजीक वेवस्था विस्कळीत जातली. चडशे केरळी नागरीक आखाती देशांनी आसतात आनी भोवतेक कामां भायल्यान येवन स्थायीक जाल्ले लोक करतात. आमच्या गोंयांतूय कांयशी अशीच परिस्थिती आसा.
नरबळी तेवूय केरळा सारक्या देव- धर्म मानिनात त्या कम्युनिस्टांच्या राज्यांत, हाचीय मना पसून खोस कांय लोकांक जाल्या. सोशल मिडिया पळयत जाल्यार हें जाणवता. प्रसंग कितें तें मतींत घेनासतना जितं मया, जितं मया म्हणीत बरेच लोक उंचाबळ जाल्यात. कर्मभोग. दुसरें कितें? माल्डा- बंगाल आनी सोमनाथ- गुजरातांतल्यो 1-1 घडणुको उक्ताडार आयल्यात. हातूंत दोन ल्हान चलयांक (एकली आठ वर्सांची) धनाचे आशेन बळी दिल्यांत. एकलेच तिच्या घरच्यांनीच. आरोपी विक्रम भगताक अटक केल्या. आदल्या तेंपार आमच्या भारताक गारुडी, डोंबारी, मांत्रिकांचो देश अशे ब्रिटीश आनी हेर पश्चिमी लोक चाळयताले. आतां कुड्डे श्रद्धेचो देश म्हूण आमची बदनामी जायना जाल्यार पुरो. खंय व्हरून दवरला आमी आमचो देश? पयशाचे आशेन कोण कितें करीत तें सांगपाक येना. म्हारगाय वाडल्या. कांय लोक हातपांय हालयनासतना लाखांनी जोडटात. मागीर आमी वर्साचीं वर्सां गरिबींत कित्याक भड्डुचें, अशी भावनां गरिबांच्या मनांत रुजल्या. ताकाच लागून चोरयो, खून, खंडणी, भेसळ, फटवणूक, भ्रश्टाचार (तो सत्ता आशिल्लेच करतात. फुडारी आनी अधिकारीय), लाचारी, गैरप्रकार…. वाडल्यात. जो तो शाॅर्टकट मारून कमी वेळांत चड जोडपाच्या
फाटल्यान लागला. तातूंत हे कुड्डे श्रद्धेचे प्रकार. सुशिक्षीत केरळांत अशें घडप ही मनीसपणाक खत लावपी गजाल. मनशाचे विचार सुदारपाक शिक्षणाचो हातभार लागना, ही गजाल खरी??
आमचे जिणेंत जें कितें बरें जालां, तें देवस्पण केल्ल्यानूच आनी जें कितें वायट जालां, तें देवस्पण चुकिल्ल्यानूच हो भाबडो, कुड्डो विस्वास जो मेरेन ना जायना, तो मेरेन हें अशेंच चलतलें, अशें दिसता. सगल्या धर्माच्या भारतीयांनी देवा- धर्माचेर श्रद्धा दवरची, मात हें करतना कुड्डे श्रद्धेक वेंग मारची न्हय. सारासार विचारान, तारतम्य बाळगून वागले नात, तर आमी एक दीस फोंडांत पडटले…. आनी ही अंधश्रद्धा समजुची न्हय!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
