केंस गळटेचेर घरगुती उपाय

भांगरभूंय | प्रतिनिधी

भलायकी आनी काती संबंदीत जायत्यो समस्या थंडीच्या दिसांनी जातात. तशेंच केंस गळपाचीय समस्याय वाडटा. अशे स्थितींत केंसांची जतनाय घेवप गरजेचें.

केंस गळपाचीं कारणां…

थंडीच्या दिसांनी जायते लोक उदक पियेवपाचें उणें करतात. ताचे बदला ते गरम च्या वा कॉफीचे सेवन चड करतात. ताका लागून कुडींत बदल जाता आनी केंस गळपाक लागता.

गरम उदक
सादारणपणान लोक थंडीच्या दिसांनी न्हावपाक फकत गरम उदक वापरतात. पूण केंस धुवपाक गरम उदक वापरूंक फावना. उदक चड थंड आसल्यार थोडें गरम उदक घालून तें कोमट करचें. चड गरम उदकान केंस धुल्यार केंस दुबळे जातात आनी केंस गळूंक लागतात.

तेल लावप गरजेचें
केंसांक घटमूट करपाक आनी योग्य पोशण मेळोवपाक केंसांक तेल लावप खूब गरजेचें. केंसांक तेल लावपाचे दोन फायदे आसात. एक म्हणल्यार केंस घटमूट जातात आनी दुसरें कात बरी उरता. देखूनच सप्तकांतल्यान उण्यांत उणें दोन फावटीं केंसांक तेल लावन मालिश करात. तेल लावचे पयलीं तें मात्शें गरम करचें, ताका लागून मुळासावन केंस घट जातात.

कापूर
कापूर केंसांची भलायकी बरी सांबाळपाखातीर खूब फायदेशीर आसता. ह्या वातावरणांत केंसांक तेल घालप आनीकय फायदेशीर थारतलें. हे खातीर तेलांत बारीक करुन इल्लो कापूर घालचो. कापूर रोखडोच तेलांत मिक्स जातलो आनी ह्या तोल केंसांचीं मुळां घट करतलें. तशेंच केंसांत आशिल्लो कोंडोय (डँड्रफ) उणो जातलो.

भरपूर उदक पियेवचें
तशेंच बरी भलायकी सांबाळपाक उदक पियेवप गरजेचें. दिसांतल्यान उण्यांत उणें बारा पेले उदक पियेवचें. थंडीच्या दिसांनी तान उणी लागता म्हणून उदक उणें पियेवंक फावना. तुमकां जाय जाल्यार गरम उदक पियेवंक शकता. हाका लागून तुमी हायड्रेटेड उरतले आनी कुडीची चरबी उणी करपाकय मजत जातली.

कोंडो ना करपाचे उपाय…

० कोमट तेलान माथ्याक मालिश केल्यार कोंड्याची समस्या सोंपता.
० खोबऱ्याचे तेल केंसां खातीर सैमीक मॉइस्चरायझर म्हूण काम करता आनी माथ्याचे कातीच्यो समस्या पयस करता.
० कोमट तेल आनी स्टीम घेवन माथ्याची मालिश केल्यारय कोंड्याची समस्या पसून सुटका मेळटा.
० केसांत कोंडो आसल्यार रातचें वेळार मालिश करात. सकाळीं केंस आनी माथ्यार लिंबाचो रोस लावचे. 15 मिनटां उपरांत शॅम्पून केंस धुवचे. हे खातीर कोमट उदकाचो वापर करचो.