भांगरभूंय | प्रतिनिधी
भांगरभूंय । प्रतिनिधी
केंपेंः खेळां मंत्री गोविंद गावडे मंगळारा सकाळीं केंपेंच्या खेळां संकुलाची पळोवणी करपाक आयिल्ले कडेन केंपेंचो आमदार एल्टन डिकॉस्ता आनी आदलो आमदार चंद्रकांत (बाबू) कवळेकार हाचें मदीं तशेंच त्यांच्या समर्थकां मदीं बाचाबाची जाली. गोविंद गावडे तशेंच समाज कल्याण मंत्री सुभाष फळदेसाय हांकां निमाणे तांकां शांत करचें पडलें.
खेळां संकुलांतल्या समस्यांची म्हायती घेवपाक गोविंद गावडे आयिल्ले तेन्ना डिकॉस्ता आनी कवळेकार हांचे समर्थक थंय जमा जाल्ले. एल्टन डिकॉस्ता हांणी समस्यांची म्हायती दितगीर कवळेकार गावडे हांचे कडेन उलोवपाक लागले. तेन्ना देवेंद्र ह्या डिकॉस्ताच्या समर्थकान कवळेकाराक कितेंय सांगपाचो अधिकार ना अशें व्हडल्या आवाजांत सांगलें. तेन्ना नगरसेवक आनी कवळेकार समर्थक दयेश नायक हाणे देवेंद्रा कडेन वाद घातलो. एल्टन डिकॉस्ता आनी चंद्रकांत कवळेकार हांणी एकमेकां कडेन हुज्जत घालपाक सुरवात केली. ह्या वेळार थंय आयिल्ल्या सुभाष फळदेसाय आनी गोविंद गावडे हांणी मध्यस्ती करून तांकां शांत केलें. मात वातावरण तापता हें पळोवन गावडे हांच्या वांगडा आयिल्ल्या अधिकाऱ्यांनी केपें पुलीस स्टेशना कडेन संपर्क सादले उपरांत थंय पुलीस आयले.
मजगतीं खेळा संकुलाची पळोवणी केल्या उपरांत समस्या तश्यो व्हडल्यो नात आनी डिसेंबर मेरेन सगळीं कामा पुराय करपाचें आस्वासन मंत्री गावडे हांणी दिलें. वेंचणुके वेळार खेळा संकुलाचो उपेग करनास्तना केपें कॉलेज सभाघर ते खातीर वापरपाची सूचोवणी गावडे हांणी केंपेच्या उपजिल्होधिकाऱ्याक केली. हाचे पयलीं खेळां संकुलांत ज्यो समस्या आसात तो दोन म्हयन्यांत सुटाव्यो करपाचे उतर दिल्लें. स म्हयने जाले तरी तेरांतलें फकत एकूच काम जालां. केप्यांतल्या लोकांक आमकां जाप दिवची पडटा. अधिकारी मंत्र्याच्या आदेशाक पाळो दिनात जाल्यार तांचेर कारवाय करात अशें डिकॉस्ता हांणी सांगलें. हाचे पयलीं बेतूल हांगच्या पंचायत घरा वयल्यान मुख्यमंत्री डॉ प्रमोद सावंत हांच्या सामकार डिकॉस्ता आनी कवळेकारा मदीं अशीच बाचाबाची जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
