भांगरभूंय | प्रतिनिधी
भांगरभूंय । प्रतिनिधी
काणकोणः पारंपरीक उदकास्रोत मोहिमें खाला केंद्र सरकाराच्या येवजणेतल्यान दक्षीण आनी उत्तर गोंयांतल्या मेळून 150 तळयाचें संवर्धन करपाचें काम करतले अशी म्हायती उदकास्रोत खात्याचो मंत्री सुभाष शिरोडकार हांणी बिरेस्तारा काणकोणात नगर्सें हांगा सरदार सरोवराचें उक्तावण केल्या उपरांत दिली.
उत्तर गोंयांत 75 आनी दक्षीण गोयांत 75 तळयो आसात. शेतकारांक शिंपणावळी खातीर उदक मेळचें हे खातीर पाणथण सुवांतो सारक्यो करतले अशें शिरोडकारान सांगलें. उक्तावण कार्यावळीक काणकोणचो आमदार आनी सभापती रमेश तवडकार, काणकोणचो नगारध्यक्ष रमाकांत नायक गांवकार, उदकास्रोत खात्याचो मुखेल अभियंतो प्रमोद बदामी, उपनगराध्यक्ष लक्ष्मण पागी, नगर्से वॉर्डाचो नगरसेवक हेमंत नायक गांवकार, मुख्याधिकारी मधु नार्वेकार, नगरसेवक सायमन रेबेलो, सारा देसाय, नार्सिस्को फ़र्नाडीस, गंधेश मडगांवकार, धीरज नायक गांवकर, शुभम कोमरपंत, अमिता पागी, सुटके झुजारी सदानंद नायक गांवकार हाजीर आशिल्ले.
फाटल्या पांच वर्सांत उदकास्रोत खात्या कडल्यान काणकोणात व्हडलीशीं कामां जालीं नात. तीं आतां जावचीं. न्हंयांनी चिखोल जालो तो काडून उडोवपाचें काम जावचें अशें रमेश तवडकार हांणी मागलें. रमाकांत नायक गांवकार हांणी आपले विचार ह्या वेळा मांडले. पालवी अभियंतो धनंजय नागवेकारान सुरवेक येवकार दिलो. हेमंत नायक गांवकारान उपकार मानले. सूत्रसंचालन शिरीष पै हांणी केलें. दापट- माशें हांगा लाटबांय हांगचे टाकयेचें उक्तावण शिरोडकारान केलें. काणकोणच्या सरकारी उच्च माध्यमीक विद्यालयाच्या सभाघऱांत ‘जल ही जीवन है’ ही जाग्रुताय कार्यावळ जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
