केंद्र सरकाराचे नवे खनिज सोद धोरण गोंयां खातीर म्हत्वाचेंः मुख्यमंत्री

भांगरभूंय | प्रतिनिधी

पणजीः गोंयांत एक वा दोन अत्यंत म्हत्वाचीं खनिजां आसपाची शक्यताय आसा. केंद्र सरकाराच्या नव्या धोरणा प्रमाण गोंयांतल्या अत्यंत म्हत्वाच्या खनिजांचो सोद घेवपाक खाजगी कंपन्यांनी फुडाकार घेवपाचो उलो मुख्यमंत्री डॉ. प्रमोद सावंत हांणी केलो. बिरेस्तारा केंद्रीय खनिज खात्यान देशभरांतल्या 13 सुवातींवेल्या खण ब्लॉक पावणी वेळार ते उलयताले. ह्या वेळार केंद्रीय खनिज मंत्री जी किशन रेड्डी, सचीव व्ही एन कांतराव, राज्याचे मुखेल सचीव व्ही कांडावेलू आनी हेर अधिकारी हाजीर आशिल्ले.
खण वेवसायांतल्यान गोंयाक व्हड फायदो जाला अशें मुख्यमंत्र्यांनी सांगलें. ह्या मळान गोंयांत नोकऱ्यो निर्माण करून अर्थवेवस्थेक योगदान दिलां. सुरवाती सावन ह्या वेवसायाक गोंयांत म्हत्व आसा. देशांतल्या सगळ्या क्षेत्रांत अत्यंत मोलादीक खनिजांचो म्हत्वाचो वांटो आसता. हरित उर्जा आनी इलेक्ट्रोनिक्स ह्या मळार हीं खनिजां उपेगी पडटात. हाचो विचार करून केंद्र सरकारान देशांतल्या अशा खनिजांचो सोद घेवपाक खाजगी क्षेत्राक आस्पावन घेतलां. हाका लागून देश म्हत्वाच्या खनिज मळार आत्मनिर्भर जातलो.
तांणी म्हणलें, गोंयचो खण वेवसायाचो व्हड इतिहास आसा. आमचें सरकार जापसालदार आनी शाश्वत खण उद्देगाक तेंको दिता. एआय वा हेर तंत्रगिन्यानाचो वापर गोंयांतल्या खण उद्देगांक उपेगी पडटलो. केंद्र सरकाराचें नवें खनिज सोद धोरण गोंयां खातीर म्हत्वाचें आसा. गोंयांतल्या अत्यंत म्हत्वाच्या खनिजांचो सोद घेवपा खातीर शक्य तितली मजत करपाक सरकार तयार आसा. हे खातीर ह्या क्षेत्रांतल्या खाजगी कंपनींनी आनी हेर भागधारकांनी फुडाकार घेवचो. ही तांचे खातीर व्हड संद थारतली.

अंदूं व्हड प्रमाणांत खणी सुरू जातल्यो…
मुख्यमंत्र्यांनी सांगलें, मंत्री जी किशन रेड्डी हांणी राज्यांतल्या खण उद्देगांचो नियाळ घेतलो. आतां मेरेन राज्यांत 12 खण ब्लॉकांची पावणी जाल्या. हातूंतले 9 ब्लॉक बेगीनूच सुरू जातले. उरिल्ल्या ब्लॉकांच्या पर्यावरण दाखल्यां विशीं केंद्रीय पर्यावरण मंत्रालय बेगीनूच निर्णय घेतलें. अंदूं व्हड प्रमाणांत खणी सुरू जातल्यो अशें तांणी सांगलें.