भांगरभूंय | प्रतिनिधी
मुख्यमंत्री डॉ. प्रमोद सावंत हांणी अर्थसंकल्पाची केली तोखणाय
पणजीः केंद्रीय करांतल्यान येवपी राज्याच्या वाट्यांत हे खेपे वाड जाल्या आनी गोंयांक अतिरिक्त ५२३ कोटी आयल्यात. तशेंच विशेश अर्थीक सहाय्य खाला भांडवल गुंतवणुके खातीर देड लाख कोटी ह्या अर्थीक वर्सा खातीर मंजूर केल्यात. अंदूंच्या अर्थसंकल्पांत पायाभूत सुविधाये सयत डिजिटल सुविधा घटमूट जावचे खातीर भर दिल्या, अशें मुख्यमंत्री डॉ. प्रमोद सावंत हांणी सांगलें.
अंदूं मांडिल्ल्या अर्थसंकल्पा विशीं डॉ. सावंत मंत्रालयांत आपली प्रतिक्रीया दिताले. ह्या वेळार समाज कल्याण मंत्री सुभाष फळदेसाय आनी उदका स्त्रोत मंत्री सुुभाष शिरोडकार हजर आशिल्ले. हांव प्रधानमंत्री नरेंद्र मोदी हांच्या फुडारपणाखाला अर्थ मंत्री निर्मला सितारामन हाकां परबीं भेटयलीं. सरळ आठवे फावट अर्थसंकल्प मांडपी सितारमन ही मबायल मंत्री जावन आसा, अशें मुख्यमंत्र्यान सांगलें.
हो अर्थसंकल्प विकसीत भारत २०४७चो बुन्यादी फातर जावन आसा. युवा शक्ती, नारी शक्ती, किसान शक्ती आनी गरीब कल्याणचेर केंद्रीत करपी हें वर्स २०२५-२६चो अर्थसंकल्प जावन आसा. कर रचणुकेंत सुदारणा करून १२ लाख मेरेनच्या येणावळींक कर मुक्त करपी तशेंच टीडीएस आनी टीसीएस मदीं समानताय हाडप हे निर्णय मध्यम वर्गीयांक थाकाय दिवपी आसात, अशें मुख्यमंत्र्यान सांगलें.
तशेंच फुडल्या सप्तकांत अर्थमंत्री नवें आयकर विधयेक मांडटले देखून कर प्रक्रीया सुटसुटीत जातली आनी अनुपालन प्रक्रीयेचें वजें लोकांचे तकलेवेल्यान उणे जातलें. तशेंच अर्थीक वर्स २०२५-२६ केंद्राच्या करांतल्या राज्याच्या वाट्यांत रु. ५४९० कोटी मेरेन वाड जाल्या. फाटल्या अर्थीक वर्सांत हो वाटो २०२४-२५ त रु. ४,९६७ मेरेन आशिल्लो. हे खेपे रु. ५२३ कोटी इतली वाड नोंद जाल्या, अशी म्हायती मुख्यमंत्र्यान दिली.
ते भायर भांडवल गुंतवणूकी खातीर विशेश अर्थसहाय्य येवजणे (५० वर्सा खातीर जूर नाशिल्लो कर) फुडाराक चालू दवरपाचें आश्वासन अर्थ मंत्री सितारमन हांणी दिवन अर्थीक वर्स २०२५-२६ खातीर रु. १.५० लाख कोटी मेळटले. तशेंच ह्या अर्थीक वर्सा खातीर राज्याक जानेवारी मेरेन रु. १,१८५ कोटी इतलें विशेश सहाय्य मेळ्ळां, अशें मुख्यमंत्र्यान सांगलें.
ते भायर कोंकण रेल्वे आनी दक्षीण पश्चीम रेल्वे खातीर गोंयाक रु. ४८२ कोटी इतले निधीचे वांटप जालां. हे तरतुदी खाला डबल ट्रकींगचें काम तशेंच मयें, नेवरा आनी सा जुझे दे आरीयल हांगा नवें रेल्वे स्टेशन उबारतले, अशेंय मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
