भांगरभूंय | प्रतिनिधी
पणजी ः केंद्रीय अर्थसंकल्पांत केल्ल्या तरतुदींचो गोंयांतले नुस्तेकार, ल्हान उद्देजक, शेतकार, आनी पर्यटन मळावेल्या वेवसायिकांक फायदो जातलो अशें केंद्रीय उद्देग आनी वेपार खात्याचे राज्यमंत्री जितीन प्रसाद हांणी सांगलें. बिरेस्तारा पणजेंत जाल्ले पत्रकार परिशदेंत ते उलयताले. ह्या वेळार प्रदेशाध्यक्ष दामू नायक आनी केंद्रीय उर्जा राज्यमंत्री श्रीपाद नायक हाजीर आशिल्ले.
अर्थसंकल्पांत एमएसएमई क्षेत्राक दिवपी रिणाची रक्कम 10 कोटी रुपया मेरेन वाडयल्या. हाचो फायदो गोंयांतल्या ल्हान उद्देजकांकच न्हय तर देशभरांतल्या सगल्या उद्देजकांकूय जातलो. पर्यटनाक चालना दिवपा खातीर देशभरांत 50 सुवाती विकसीत करतले. होम स्टे खातीर मुद्रा रीण दिवपाची तजवीज केल्या. हॉस्पिटॅलिटी क्षेत्रांत कुशळटाय वाडोवपाक चालना दितले. बऱ्या पर्यटन थळांचो निकश पाळपी राज्यांक खाशेलो निधी दितले अशें जितीन प्रसाद हांणी सांगलें.
केंद्रीय अर्थसंकल्पांत सामान्य मनशां खातीर जायत्यो तरतुदी केल्यात अशें तांणी सांगलें. हाका लागून विरोधकांक लेगीत अर्थसंकल्पांत कसलीच चूक मेळ्ळी ना. अर्थसंकल्पांतल्यान मध्यमवर्गीय, बायलां, तरणाटे, शेतकार आनी गरीब लोकां खातीर वेगवेगळ्यो येवजण्यो हाडल्यात. भारताक संवसारांतली फूड बास्केट करपाच्या हेतान शेतकारां खातीर वेगवेगळ्यो तजवीज केल्यात. हाचो फायदो शेतकारांक, दूद उत्पादकांक, आनी नुस्तेकारांक जातलो. संवसारीक अस्थिरतायेच्या काळांत लेगीत भारतीय अर्थवेवस्था संवसारांत पांचवें क्रमांकाचेर आसा. प्रधानमंत्री नरेंद्र मोदी हांच्या फुडारपणा खाला आमची अर्थवेवस्था बेगीनूच तिसऱ्या सुवातेर येतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
