कॅरोलिना

भांगरभूंय | प्रतिनिधी

ल्हान आसतना ताच्या घरच्यांनी ताचें नांव कॅरोलिना आसलें. तें उलो मारतना कॅरल केल्लें. तेन्नासावन तें कॅरलच उरलें. आता इश्कॉलांत सुद्दां सगळी ताका कॅरल नांवान उलो करतालीं.
कॅरल शिकपांत खूब हुशार आसलें. परिक्षेंत सदांच पयलो वा दुसरो जागो घेतालें. एकांकी नाटकांनी बरी भुमिका करतालें. खेळांमळारूय पर्जळटालें आनी इश्कॉलाचें नांव उबारून दवरतालें. कारण नासतना घरा राव नासलें. इतलें सगळें बरें आसतना चालू आशिल्लें शिक्षणीक वर्स सुरू जायत सावन तें सगळ्याच वटांनी आळशीपणा करूंक लागिल्लें. ताका फकत बारा वर्सां आसलीं. ताच्या मुखामळावेलो आमुरको हांसो, खुशालकाय, उमेद आतां मात्तूय दिश्टी पडनासली. कसल्याच सर्तींनी भाग घेनासलें. ताच्यो टिचरी आनी प्रिन्सिपल देखून ताचे विशीं विचारांत पडिल्लीं.
कालच्या दिसा चवथे फावटी तें वर्गात गैरहाजीर आसलें. पयले फावट इश्कॉलाक वचूंक ना तेन्ना ताच्या शिक्षकान ताचो फाटलो निकाल मनांत दवरून चीट हाडूंक ना म्हणून कांय म्हणूक नासलें. दुसरे आनी तिसरे फावटी ताणें आपल्या आज्याची चीट हाडिल्ली. शिक्षकांनी कांय म्हणूक ना. कितलोय जाल्यार तोवूय घराचो एक जाण्टो वडीलच आसलो. ताच्या वयाचो मान दवरून तांणी हय-ना करून त्यो चिटी फायलींत घाल्यो. काल तें चवथे फावटी गैरहाजीर रावलें. आज इश्कॉलाक येताना चिटूय हाडूंक ना. शिक्षकाचो वर्ग सोंपले उपरांत ती प्रिन्सिपलाच्या अफिसांत गेली. आनीक एकदां कॅरलचो विशय तिणें तांचे मुखार मांडलो. तोवूय चिंतूंक पडलो. हातूंत किलें तरी ‘पूण आसा अशें तांकां दिसलें.
“ताचो पापा यू.कें.त आसा म्हण हांव जाणां. फार्टी चार दीस लें गैरहाजीर राविल्लें तेन्ना एकूय फावटी मम्मीची चीट हाडूंक ना?” प्रिन्सिपलान टिचरीक विचारलें
“ना सर”.
“आयज कोणाची हाडल्या?”
“कोणाचीच हाडूंक ना. विचारल्यार एकूय जाप काडीना. चड दाब घालून विचारूंकय बरें दिसना.”
“एक काम कर, ताचे मम्मीक फोन कर आनी फाल्यां सकाळीं इश्कॉलांत आफयल्या म्हण सांग. हांवें सांगलां म्हण सांग.”
दुसऱ्या दिसा ताची मम्मी येवन पयली ताचे क्लास टिचरीक मेळ्ळी. ती तिका घेवन प्रिन्सिपला कडेन गेली.
“कॅरल आमच्या इश्कॉलाक धन जावन आसा. ताणें इश्कॉलाक एकदम बरें नांव हाडलां. पूण हें शिक्षणीक वर्स सुरू जायत सावन ताचें वागप वेगळेंच तरेचें जालां. फाटल्या तीन म्हयन्या मदें तें चार दीस गैरहाजीर आसा. इश्कॉलाक येना तें येना उपरांत गैरहाजीर रावपाचें कारण दिता. तें आमच्या मनाचें समाधान करपा सारकें आसना.”
“पूण सर तें केन्ना गैरहाजीर रावलां?” ताचे मम्मीन अजाप जावन विचारलें.
“तुका खबर ना?”
“सर, हें शिक्षणीक वर्स सुरू जाल्यार तें एकूय दीस घरा रावूंक ना. ना म्हण तें दुयेंतय पडूंक ना”
“पयरच्या दिसा तें चवथे खेपे गैरहाजीर आसा.” प्रिन्सिपलाची उत्तरां आयकून ताची मम्मी खोल विचारांत पडली. ती एकूय जाप काडीना ती पळोवन प्रिन्सिपलान फुडें म्हुणलेः
पयले फावट चीट हाडूंक ना तेन्ना आमी वगी रावलीं. दुसरे फावट आनी तिसरे फावट ताणें आपल्या आज्याची चीट हाडल्या.
‘आज्याची चीट हाडल्या?” प्रिन्सिपल किलें सांगता ते पूर्ण करचे आदीच तिणे अजाप जावन विचारलें.
“हय, आनी पयर रावलां ताची चिटूच हाडूंक ना. कारण विचारल्यार जाप काडिना.”
“ताचो ग्रॅण्डपा” ती फुडें उलोवपाची थांबली.
‘कितें जालें, ताका ग्रॅण्डपा ना?”
“ना..” तिणें ‘ना म्हणलें आनी फुडली उतरां चाबडायली इतल्यान प्रिन्सिपलान मेजार आशिल्ली बेल वाजयली आनी चपरासीक आफोवन हाडलो.
दिलो “सालू, ‘सातवी ब’ वर्गात वच आनी कॅरल नांवाचे विद्यार्थीनीक घेवन यो” प्रिन्सिपलान चपरासीक आदेश दिलो.
“नाका सर ताका आफयनाका, तें आयज घरा आयल्या उपरांत हांवूच विचारतां ताका.”
“तें इश्कॉलाक गैरहाजीर आसा,
चीट हाडूंक ना, वासपूस करपाक आमचो कायदो जाता.” तांचे मदीं थोडें उलोवप जाता म्हळ्यार कॅरल प्रिन्सिपलाचे कचेरींत उबें जालें.
“कॅरल फाटल्या तीन म्हयन्या मदीं चार फावटी तूं इश्कॉलाक येवंक ना. सदांचे वरी तू घरांतलें भायर सरलां आनी इश्कॉल सोंपता तेन्ना धरा पावलां. हे चार दीस तू खंय गेल्लें?” तें एकूय जाप काडिनासतना तकली सकयल घालून वगीच रावलें. दुसरे वटेन ताचे मम्मीचें मुखामळ सगळेंच उचांबळ जाल्लें. ए.सी. चालू आसुनय ती घामान बुडिल्ली.
“सांग कॅरल, तुवें भिवपाची गरज ना.”
चारय फावटी हांव म्हज्या ग्रॅण्डपाक मेळूक गेल्लें. तो म्हजो खूब मोग करतालो आनी आजुनय करता. हांव ताचेकडे गेल्यार तो खूब खुशाल जाता. थोड्या वेळाक आमी खूब खेळटात. हांव येता म्हण तो खुशाल जाता खरो पूण इश्कॉल चुकयता म्हण खूब दुख्खी जाता. पयर गेल्लें तेन्ना ताणें म्हाका चिटूय दिवंक ना. ताच्या वडिलांनीय म्हाका सांगलां इश्कॉल चुकोवन परत येनाका म्हण.
“तो खंय आसा तर?”
‘बोर्डा, अनाथ घरांत. म्हाका ग्रॅण्डपाचो उगडास येता तेन्ना हांव वतलें ताका मेळूंक..” कॅरलाचे सांगणें आयकून सगळीं गुपचूप पडलीं. कॅरलाची मम्मी केन्ना ताच्या हाताक धरून तांचे म्हऱ्यांतली कुशीक सरली ते पसून प्रिन्सिपलाक कळूंक ना.

अँन्थनी मिनेझीस

9822980231