भांगरभूंय | प्रतिनिधी
पणजी : कॅन्सर, गोडेंमुताचें, हाय ब्लडप्रेशर तशेंच हेर गंभीर दुयेंसाच्या (एनसीडी) संशोधना खातीर रगताचे नमुने घेवपा वांगडा वजन तशेंच हेर गजालींची म्हायती घेवपा खातीर खास कर्मचार्यांची नियुक्ती करतले. गोंय कॅन्सर संस्थेचे वांगडी डॉ. शेखर साळकार हांणी ही म्हायती दिली. ही नेमणूक कंत्राटी वा दिसपट्ट्या तत्वाचेर जावपाची शक्यताय आसा.
कॅन्सर, गोडेंमूत, हाय ब्लड प्रेशर तशेंच हेर गंभीर दुयेंसांचें प्रमाण आनी कारणां सोदपा खातीर लॉंजीट्युडनल कोहोर्ट स्टडी उपक्रमाचें फाटल्या सप्तकांत उक्तावण जालें. भलायकी संचालनालय टाटा मेमोरीयल हॉस्पिटल (मुंबय) आनी ऑक्सफर्ड विद्यापीठ हांच्या सहकार्यान हें संशोधन करतले. १ लाख लोकांच्या रक्ताचे नमुने आनी हेर म्हायती घेवन ताचेर संशोधन करतले. ह्या संशोधनाच्या आदारार निश्कर्श जाहीर करतले. १ लाख लोकांची तपासणी आनी म्हायती घेवपाक एका वर्सा परस चड काळ लागतलो. उपरांत टाटा मेमोरीयल हॉस्पिटलाचे तज्ज्ञ ऑक्सफर्ड विद्यापीठाचे मजतीन संशोधन करतले. हाका आनीक वेळ लागतलो. संशोधनाचो निश्कर्श येवपाक सुमार ३ वर्सांचो काळ लागतलो, अशी म्हायती डॉ. साळकार हांणी दिली.
सांखळे, वाळपय, काणकोण आनी किनारपट्टी वाठारांतल्या नागरिकांची तपासणी पयल्या टप्प्यांत करतले. हाचे खातीर भलायकी खात्या वतीन खास कर्मचार्यांची नेमणूक करतले. उपक्रमा खातीर भलायकी खात्याक वर्साक ३ कोटी रूपया खर्च येवपाचो अदमास आसा. ते प्रमाण अर्थसंकल्पांत तरतूद करपाची मागणी मुख्यमंत्री डॉ. प्रमोद सावंत हांचे कडेन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
