भांगरभूंय | प्रतिनिधी
बोडगेश्वर शेतकार संघाचो दावो; राज्यपालांनी विधेयकाक मान्यताय दिवची न्हय
म्हापशें: गोंय सरकारान हालींच गोंय कृशी जमीन हस्तांतरण प्रतिबंधीत 2023 हें विधेयक मंजूर केलां. हें विधेयक शेतकार आनी कूळ मुंडकारां आड आशिल्ल्याचो दावो करून ह्या विधेयकाक श्रीबोडगेश्वर शेतकरी संघान विरोध केला. हे विशीं राज्यपालांची भेट घेवन ह्या विधेयकाक मान्यताय दिवची न्हय अशी विनंती करतले अशी म्हायती संघाचे अध्यक्ष संजय बर्डे हांणी दिली.
मंगळारा म्हापश्यां आयोजीत केल्ले पत्रकार परिशदेंत संजय बर्डे उलयताले. ह्या वेळार शेतकार महेश उसपकार आनी अनील केरकार हाजीर आशिल्ले.
आमची शेतां पुर्वजांनी पिळग्यान पिळग्यो सांबाळ्ळ्यांत. सरकारान पारीत केल्लें गोंय कृशी जमीन हस्तांतरण प्रतिबंधीत विधेयक हें शेतकारांच्या हिताचें न्हय. ह्या विधेयकांक खूबशे मुद्दे हे अतार्कीक आसात. शेतकारांनी सेगीत तीन वर्सां शेतां केलीं नात जाल्यार जिल्होधिकाऱ्याक सदर जमीन शेतकारां कडल्यान काडून घेवपाचो अधिकार दिला अशें बर्डेन सांगलें.
शेत जमनींत कूळ आसतात. खूबशे फावटी भाटकार ह्या कुळांक शेतां करपा पसून आडायतात. उपरांत प्रकरण न्यायप्रविश्ट जाता. वर्साचीं वर्सां खटले चलतात. अशा वेळार शेतकारांनी शेतांची मशागत केली ना असो दाखलो दिवन सरकार शेतां काडून घेतले. हे विशीं विधेयकांक शेतकार वा कुळांचे सुरक्षे विशीं तरतूद करून विधेयकांक पारदर्शकताय हाडची अशी मागणी बर्डे हांणी केली.
तशेंच विधेयका प्रमाण शेतकारांक रीण काडूंक मेळचें ना. मागीर शेतकारांनी शेतां कशीं करचीं. शेतांचे मशागती खातीर अर्थीक आदार तितलोच म्हत्वाचो आसता हाचे कडेन बर्डेन लक्ष ओडलें.
म्हापश्यां बोडगिणी कुशीक सरकारान रस्त्याच्या दोनूय वटांनी जिसुडा वतीन विकासकामां केल्यांत. ह्या वेळार शेतकारांच्या शेतांनी वचपी परंपरीक पांयवाटो अडायल्यात. सरकारान ह्यो पांयवाटो मेकळ्यो करच्यो अशी मागणी संजय बर्डेन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
