भांगरभूंय | प्रतिनिधी
डाॅ. गुणाजी देसाय ः चौगुले महाविद्यालयान मनयलो योग दीस
भांगरभूंय प्रतिनिधी
मडगांव ः नेमान योग केल्ल्यान कुडीचेर सकारात्मक परिणाम जाता आनी ऊर्जा वाडटा. कूड आनी मन निरोगी उरपा खातीर योग खूब फायदेशीर अशें मानतात. योग केल्ल्यान कुडीक ऊर्जा मेळटा. स्नायूंची ताकद वाडटा. श्वसन आनी चैतन्य सुदारून रोग प्रतिकार शक्तूय वाडटा अशें मेजर डाॅ. गुणाजी देसाय हांणी सांगलें.
योग दिसाची थीम मनीसकुळये खातीर योग हे विशीं स्पश्टीकरण दितना आंतरराष्ट्रीय योग दिसाचें म्हत्व डाॅ. गुणाजी देसाय हांणी राष्ट्रीय छात्र सेनेच्या छात्र सैनिकांक समजावन सांगलें. ही खाशेली कार्यावळ वन गोवा बटालियन एनसीसीचे वतीन चौगुले महाविद्यालयाच्या फुटसाल मैदानार जाली.
वन गोवा बटालियन एनसीसीचे एडम आॅफिसर कर्नल बी. एस. चरक हांच्या मार्गदर्शना खाला ही कार्यावळ जाली. कार्यावळीची सुरवात प्रार्थना करून जाली. उपरांत छात्र सैनिकांनी प्रोटोकाला प्रमाण तरेकवार योगासनां केलीं, सोपूत घेतलो आनी शांतीपाठ म्हणलो.
सिनियर अंडर आॅफिसर पदम सिंग हांणी कार्यावळीचें सुत्रसंचालन केलें. हे कार्यावळी उपरांत तीन महाविद्यालयांतल्या सगल्या छात्र सैनिकांनी पार्वतीबाई चौगुले महाविद्यालयाच्या आर्टिफिशिय टर्फ ग्रावंडार वचून आकर्शक योगासनां केलीं.
ही कार्यावळ येसस्वी करपा खातीर मुखेल संयोजक मेजर देसाय हांकां श्री दामोदर महाविद्यालयाच्या छात्र सेनेचे अधिकारी लेफ्टनंट संदेश गांवकार, रोजरी महाविद्यालयाचे कॅप्टन जुआंव काॅस्ता,. वन गोवा बटालियन एनसीसीचे अधिकारी जहांगीर बिस्वास, पितम बहादुर गुरूंग, चौगुले महाविद्यालयांतली संजया स्वैन, विठ्ठल शिंदे, रणजीत मोहंती आनी टायगर स्टुडिओच्या प्रशिक्षणार्थ्यांनी योगदान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
