भांगरभूंय | प्रतिनिधी
-40 भारतीया सयत 49 जाणांक हुलपून मरण
कुवैतः कुवेतांत मंगाफ शारांत बुधवारा सकाळीं व्हड दुर्घटणा घडली. एका रहिवासी इमारतीक भिरांकूळ उजो लागून 40 भारतिया सयत 49 जाणांक हुलपून मरण आयले. जखमींक लागसारच्या हॉस्पिटलांत उपचारा खातीर दाखल केल्यात. इमारतींत भारता सयत आशियांतल्यान आयिल्ल्या मजुरांचो राबितो आशिल्लो. एका फ्लॅटांतल्या किचनांत उजो लागलो आनी तो कांय मिण्टांत पुराय इमारतींत पातळ्ळो. ज्या फ्लॅटांत उजो लागलो त्या फ्लॅटांत केरळांतली एक व्यक्ती राबित्याक आशिल्ली. तशेंच इमारतीत रावपी भोवसंख्य लोक दक्षीण भारतीय नागरीक आसात. मरण अायिल्ल्यां 10 भारतीयां मदीं पांच जाण मूळचे केरळाचे रहिवासी आसात.
कुवेतच्या वेळे प्रमाण सकाळीं 6 वराच्या सुमाराक ही दुर्घटणा घडली. फक्त 30 जाण जखमी जाल्ल्याची म्हायती परराष्ट्र मंत्रालयान दिल्या. मरण आयिल्ल्यांत कितले भारतीय आसात, हे विशीं अजून निश्चीत म्हायती ना. पूण ते केरळ आनी तामिळनाडूंतले आशिल्ल्याचो दुबाव आसा.
प्रधानमंत्री मोदी, काँग्रेस फुडारी राहूल गांधी आनी ममता बॅनर्जी हांणी घडणुकेचेर दुख्ख उक्तायलां. दुसरे कडेन कुवेतचे गृह मंत्री शेख फहद अल-युसूफ हांणी सांगलें, इमारतींत जायत्या देशांचे लोक बेकायदो रावताले. ताका लागून मरण आयिल्ल्या विशीं अजून कसलीच ठोस म्हायती मेळूंक ना.
उजो लागपाचें कारण स्पश्ट जावंक ना
सकाळीं तळमाळयेर किचनांत लागिल्लो उजो नेटान पुराय इमारतींत पातळ्ळो. जायते लोक इमारतींत आडकल्ले. उज्याचे कारण अजून समजूंक ना. हे इमारतींत 200 परच चड कामगार रावताले.
मरण आयिल्ल्यांची पिराय 20 ते 50 वर्सां
मरण आयिल्ल्यांची पिराय 20 ते 50 वर्सां मजगतीं आसा. तातूंतले भोवतेक केरळ, तामिळनाडू आनी उत्तर भारतीय आसात. सगले जाण एनबीटीसी कंपनींत कामाक आशिल्ले.
भारतीय राजदूत घडणूक सुवातेर
भारतीय राजदूत आदर्श स्वैका हांणी घडणूक सुवातेक भेट दिवन जखमींची भेट घेतली. तशेंच परराष्ट्र मंत्री एस. जयशंकर हांणी सांगलें, कुवेतांतल्या दुर्घटणेक लागून दुख्ख जाल्ल्याचे सांगलें. थंय सुमार 40 लोकांक मरण आयलां. पूण आमी तपशील मेळपाची वाट पळयतात.
इमारतीचो धनी मल्ल्याळम वेपारी केजी अब्राहम
इमारतींत रावपी भारतीय केरळ आनी तामिळनाडूचे आशिल्ले. ही इमारत बांदकाम क्षेत्रांतली कंपनी आशिल्ल्या एनबीटीसी समूहाची आशिल्ली. इमारतीचे धनी मल्ल्याळी वेपारी केजी अब्राहम आसात. ताका अटक करपाचे आदेश थंयच्या प्रशासनान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
