भांगरभूंय | प्रतिनिधी
फोंडें: कुळें पुलीस स्टेशना सावन 500 मिटर अंतराचेर आशिल्ल्या शिला वेरेंकार आनी शब्बीर मुल्ला हांच्या घरांत घुसून अनवखळ्यांनी मुखेल दार फोडून चोरयेचो यत्न केलो. पूण मोलादीक सामान हाताक लागून नाशिल्ल्यान चोरांनी हेर साहित्याक हात लायलो ना. सोमारा सकाळीं चोरयेचो प्रकार उक्ताडार आयलो.
मेळिल्ले म्हायती प्रमाण शेजारी आशिल्ल्या दोनूय घरांनी आयतारा कोणूच नाशिल्ले. शिला वेरेंकार ही आपले धुवेगेर गेल्ली. जाल्यार शब्बीर मुल्ला हांचे कुटुंब लेगीत सोयऱ्यांगेर गेल्लें. चोरांनी आयतारा रातीं मुखेल दाराचें कुलप मोडून घरांत प्रवेश केलो. घरांत आशिल्ल्या आलमारीचें दार चोरांनी फोडून मोलादीक साहित्य सोदपाचो यत्न केलो. पूण दोनूय घरांनी चोरांक मोलादीक साहित्य सांपडलें ना. कुळें पुलिासांनी घडणुकेचो पंचनामो केला. थळाव्यांनी दिल्ले म्हायती प्रमाण कांय म्हयन्यां पयलीं शिला वेरेंकार हांच्या घरांत चोरांनी चोरयेचो यत्न केल्लो.
पर्यटक बुडलो
कुळें हांगासरल्या दुदसागर धबधब्यार काल (सोमारा) न्हाता आसतना आर्थीक शुक्ला (31, भोपाळ) हो पर्यटक उदकांत बुडलो. निरिक्षक संजीव दळवी हांच्या मार्गदर्शना खाला बेपत्ता पर्यटकाचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
