भांगरभूंय | प्रतिनिधी
फोंडें, प्रतिनिधी : मध्यप्रदेशांतल्या दोगां नेण्ट्या चलयांचेर सामुहीक बलात्कार केल्ल्या प्रकरणांत जय सिंह (३५), सना सिंह (२४) आनी देवलाल आगारिया (२२) ह्या छत्तीसगडच्या तिगांक कुळें पुलिसांनी अटक केल्या. हे तिगूय तरणाटे रेल्वे दोट्टीकरणाचें काम करपी मानाय. तांकां आयज रिमांडा खातीर न्यायालयांत व्हरतले.
चांदर गांवांत मध्यप्रदेशाच्यो १७ पिरायेच्यो ह्यो दोगूय चलयो पंदरा दिसां पयलीं कामा खातीर आयिल्ल्यो. पूण काम जमनाशिल्ल्यान तीं दोगांय ८ जानेवारीक परत मूळ गांवांत वचपाक सांजेवेळार कुळें रेल्वे स्टेशनाचेर आयलीं. ही रेल्वे दुसर्या दिसा सकाळीं सुटपाची आशिल्ली. ताका लागून तीं दोगांय रातचीं जेवन रेल्वे स्टेशना कडेच न्हिदिल्लीं. ह्या वेळार रेल्वे दोट्टीकरणाचें काम करपी ह्या मानायांची नदर त्या दोगांय चलयांचेर पडली आनी त्या तिगांयनी मेळून तांचेर बलात्कार केलो, अशी कागाळ कुळें पुलीस स्टेशनांत नोंद जाल्या.
ह्या चलयांनी पयलीं रेल्वे पुलिसांक हे घडणुकेची म्हायती दिल्ली. पूण रेल्वे पुलिसांनी तपास केल्या उपरांत ही घडणूक कुळें पुलीस स्टेशनाचे हद्दींत घडिल्ल्याचें तांकां दिसून आयलें. ते प्रमाण दोगांय चलयांनी कुळें पुलीस स्टेशनाचेर कागाळ दिली. हाची दखल घेवन कुळें पुलिसांनी तिगूय दुबावितांक अटक केली.
आयज सकाळींदुबावितांक मडगांवच्या हॉस्पिटलांत वैजकी तपासणे खातीर व्हेलीं. कुळें पुलीस स्टेशनाचे निरीक्षक सगुण सावंत हांच्या मार्गदर्शना खाला उपनिरीक्षक विभावरी गांवकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
