भांगरभूंय | प्रतिनिधी
हजारांनी पर्यटकांनी घेतलें दुदसागर घसघशाचें दर्शन
भांगरभूंय । प्रतिनिधी
फोंडें: कुळेंच्या दुदसागर घसघसो पर्यटना विशीं निर्माण जाल्लो वाद मुख्यमंत्री डॉ. प्रमोद सावंत हांणी केल्ले मध्यस्थीक लागून सुटला. दुदसागर जीप ऑपरेटर्स संघटणा आनी मुख्यमंत्री हांचे मदीं जाल्ले बसकेंत वाडयल्लें 200 रुपयांचें शुल्क उणओं करून जीटीडीसीच्या कावंटरा सयत ऑनलायन बुकींग लेगीत चालू दवरपाचो निर्णय घेतला. ताका लागून आयतारा कुळें बाजाराक जात्रेचें स्वरूप आयिल्लें. हजारांनी पर्यटकांनी आयतारा दुदसागर घसघशाचें दर्शन घेतलें. जीप धनयांनी सांखळी उपोशण सध्या फाटीं घेतलां. संघटणेंत फूट घालपाचो यत्न करचो न्हय, अशें संघटणेच्या जाळवणदारांनी मारला.
फाटल्या कांय दिसां सावन चालू आशिल्लो वाद अखेरेक शेनवारा राती मुख्यमंत्री डॉ. सावंत हांणी बसका घेवन उपाय काडून सोंपयलो. गोंय पर्यटन उदरगत मंडळान सुरू केल्लो कावंटर बंद करचो आनी संघटणेची बॅबसायट परतून करपाची मागणी जीप धनी करताले. आयतारा संघटणेचे अध्यक्ष निलेश वेळीप हांणी जीप धनयांची बसका घेवन मुख्यमंत्र्यां वांगडा जाल्ले बसकेंत घेतिल्ल्या निर्णया विशीं म्हायती दिली.
मुख्यमंत्री डॉ. सावंत हांच्या आदेशा प्रमाण जीप धनयांनी सुरू केल्लें सांखळी उपोशण स्थगीत दवरपाचो निर्णय घेतलो. ते उपरांत पर्यटकांक घेवन जिपी घसघशाचेर गेल्यो. आयतारा हजारांनी पर्यटकांनी कुळें गांवांत गर्दी केल्ल्यान दुकानकारांनी समाधान उक्तायलें. पर्यटकांक लागून कुळें बाजार परतून फुल्ला. वादाचेर उपाय काडचे खातीर आदले खासदार विनय तेंडुलकार, आदले मंत्री दीपक पावसकार, सांवड्डें भाजप मंडळाचे अध्यक्ष विलास देसाय, रमाकांत गांवकार, मच्छिंद्र देसाय आनी हेर भाजपा कार्यकर्त्यांनी म्हत्वाचें योगदान दिलें. आयतारा लेगीत स्थितीचेर नदर दवरचे खातीर व्हड प्रमाणार पुलीस बंदोबस्त दवरिल्लो. फोंडें पुलीस स्टेशनाचे उपअधिक्षक शिवराम वायंगणकार हांणी लेगीत कुळें वाठारांत वचून स्थितीचो नियाळ घेतलो.
संघटणेंत फूट घालपाचो यत्न करचो न्हयः वेळीप
मुख्यमंत्री डॉ. प्रमोद सावंत हांणी हे संबंदांत उपाय काडला. एका म्हयन्या उपरांत परतून बसका जातली. मागण्यो मान्य करून घेवचे खातीर जीप धनयांक खूबश्या राजकी पक्षांच्या फुडाऱ्यांनी तेंको दिलो. तशेंच आदले खासदार विनय तेंडुलकार, आदले मंत्री दीपक पावसकार, भाजप मंडळाचे अध्यक्ष विलास देसाय, रमाकांत गांवकार, मच्छिंद्र देसाय आनी हेरांनी म्हत्वाची कामगिरी करून वाद सोंपोवपाक मजत केली. वेवसाय वेवस्तीत सुरू दवरचे खातीर संघटणा यत्न करतली. पूण जीप धनयां मदीं परतून फूट घालपाचो यत्न कोणेच करचो न्हय, असो उलो दुदसागर टूर ऑपरेटर संघटणेचे अध्यक्ष निलेश वेळीप हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
