भांगरभूंय | प्रतिनिधी
फोंडें: दीपनगर कुर्टी वाठारांत मंगळारा सकाळीं 6 वरांच्या सुमाराक मालवाहू ट्रकाचो हँडब्रेक निकामी जाल्ल्यान ट्रक फुडें गेलो आनी अलॉयसीस थॉमस (21, केरळ) ह्या क्लिनराक दोन ट्रकां मदीं चिड्डून मरण आयलें. ह्या अपघात प्रकरणांत फोंडें पुलिसांनी ट्रक ड्रायव्हर नियाज व्ही. हाका अटक केल्या.
पुलिसांनी दिल्ले म्हायती प्रमाण केएल 13 के 7356 नंबराचो मालवाहू ट्रक मंगळारा सकाळीं दीपनगर पावलो. ह्या वेळार ट्रक ड्रायव्हरान मुखार पार्क केल्ल्या आनीक एका ट्रका मुखार आपलो ट्रक दवरलो. हँडब्रेक ओडून ड्रायव्हर आनी क्लिनर दोगूय खाला देविल्ले. ह्या वेळार क्लिनर ट्रकाच्या फुडले वटेन गेलो तेन्ना ट्रकाचो हँडब्रेक निकामी जालो आनी ट्रक सरळ फुडें गेलो. ह्या वेळार दोन ट्रकाच्या मदीं क्लिनर आडकलो. गंभीर अवस्थेंत ताका 108 एम्ब्युलन्सींतल्यान उपजिल्हो हॉस्पिटलांत दाखल केलो. पूण थंय दोतोरांनी ताका आदींच मरण आयिल्ल्याचें घोशीत केलें. निरिक्षक विजयकुमार चिडणकार हांच्या मार्गदर्शना खाला उपनिरिक्षक सुरज काणकोणकार ह्या प्रकरणांत अदीक तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
