भांगरभूंय | प्रतिनिधी
पणजी, प्रतिनिधी ः भारतीय सैन्यान गोंयचो मान वाडयला. मेजर जनरल पदाचेर काम करपी सुमेर इव्हान डिकुन्हा हांकां लेफ्टनंट जनरल पदाचेर बडटी मेळ्ळ्या. देखून आतां ते नवी दिल्लींतल्या लश्करी मुख्यालयांत वायुसेनेच्या महासंचालक पदाचेर आसतले. विशेश म्हणल्यार तांकां फकत 13 म्हयन्यांत ब्रिगेडियर ते मेजर जनरल ते लेफ्टनंट जनरल म्हूण बडटी मेळ्ळ्या.
लेफ्टनंट जनरल डिकुन्हा हे देहरादूनच्या भारतीय लश्करी अकादेमीचे आदले विद्यार्थी. डिसेंबर १९९८ वर्सा ते वायुसेनेंत भरती जाल्ले. ते कुडटरी रावपी सर्गेस्त मेजर जनरल इव्हान डिकुन्हा आनी जेम्मा पिंटो हांचे पूत. जेम्मा लेखक, शिक्षक आनी वैयक्तीक उदरगत प्रशिक्षक म्हणून लोकप्रीय आसात. सुमेर हे अभियंते. ते इन्स्टिट्यूट ऑफ आर्ममेंट टेक्नॉलॉजींतल्यान तंत्रीक कर्मचारी अधिकारी अभ्यासक्रमांतल्यान पदवीधर आसा. तांणी महूच्या आर्मी वॉर कॉलेज आनी नवी दिल्लीच्या नॅशनल डिफेन्स कॉलेजींत उच्च कमांड अभ्यासक्रमांत शिक्षण घेतलां.
लेफ्टनंट जनरल डिकुन्हान आयज मेरेन आपले सेवेंत उत्कृश्ट कर्मचारी म्हूण मान मेळयला. तांच्या कमांड नियुक्तींत मिसाइल रेजिमेंट कमांड, एअर डिफेन्स ब्रिगेड इन वेस्टर्न सेक्टर आनी जनरल ऑफिसर कमांडिंग, मध्य प्रदेश उपक्षेत्र हांचो आस्पाव आसा. जम्मू- काश्मीरांत असिस्टंट क्वार्टर मास्टर जनरल आनी आसामांत डेप्युटी जनरल ऑफिसर कमांडिंग ह्या पदांचेर तांणी मुखेल कर्मचाऱ्यांची नेमणूक केल्या.
लेफ्टनंट जनरल डिकुन्हा हांकां ताच्या कारकिर्दींत दोन फावटीं प्रतिश्ठीत प्रशस्तीपत्रां मेळ्ळ्यांत. इराणांतल्या भारतीय दूतावासांत भारताचो लश्करी आनी हवाई संलग्नक म्हणून तांची परदेशांत नेमणूक जाली. तांणी रडार्स आनी धातूशास्त्रांत एमएससी, संरक्षण आनी रणनिती अभ्यासांत एम. फिल आनी वेवस्थापनांत पीएचडी करून आपलो शिक्षणीक प्रवास चालू दवरला.
सुमेराचे घरकान्नीचें नांव फराह. ती स्वता मेजर जनरल युस्टेस फर्नांडीस हांची धूव. काश्मीरांत आतंकवाद्यां कडेन झुजतना युस्टेड शहीद जाल्ले. सुमेर आनी फराहाचो पूत अर्जुनान आयआयटी पुराय केल्या. धूव अंजली वेवसायान वकील आनी उत्कृश्ट पियानोवादक जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
