भांगरभूंय | प्रतिनिधी
आमदार विरेश बोरकार हांचें पंचायत संचालनालयाक निवेदन
भांगरभूंय । प्रतिनिधी
पणजीः कुडका आर्मी कॅम्पा लागसार उबारिल्ली बेकायदेशीर झोपडपट्टी मातयेभरवण करची. हे विशींचे स्पश्ट निर्देश उच्च न्यायालयान दिल्यात, पूण अजून मेरेन थळावे पंचायतीन कसलीच कारवाय हे झोपडपट्टे आड करूंक ना. तशेंच कुडका पंचायतीन बांबोळे एक मेगा रिसोर्ट प्रकल्पाक दिल्ले दाखले फाटीं घेवचे, अशी मागणी थळावे आमदार विरेश बोरकार हांणी केल्या.
सांत आंन्द्रेचे आमदार विरेश बोरकार हांणी पंचायत संचालनालयाक भेट दिली. बांबोळे वर्ल्डवायड रिसोर्टाक दिल्लो दाखलो फाटीं घेवपाक लावचो तशेंच कुडका आर्मी कॅम्पाक तेंकून उबारिल्ली झोपडपट्टी उच्च न्यायालयाच्या आदेशाक पाळो दिवन मोडून उडोवची, अशीं मागणी करपी निवेदन पंचायत उपसंचालक कृष्णनाथ पांगम हांकां भेटयलें.
निवेदन दिले उपरांत बोरकार हांणी सांगलें, पंचायत संचालक सिध्दी हळर्णकार ही गैरहजर आशिल्ली, हे खातीर तांणी उपसंचालकांक हें निवेदन भेटयलें.
बांबोळे वर्ल्ड वायड रिसोर्टाक नगर नियोजन खात्यान तशेंच पर्यावरण खात्यान दिल्ले दाखले दोनूय खात्यांनी रद्द केल्यात. ह्या प्रकल्पाचें काम बेकायदो आसा. हे खातीर ह्या प्रकल्पाक पंचायतीन दिल्ले सगळे दाखले फाटीं घेवपाचे निर्देश कुडका पंचायतीक दिवचे, अशी मागणी आमी उपसंचालका कडेन केल्या, अशें बोरकार हांणी सांगलें.
तशेच बिगर गोंयकारांनी कुडका आर्मी कॅम्प लागसार झोपडपट्टी उबारल्या. तांकां बेकायदो उदका आनी लायटीची जोडणी दिल्या. ह्यो खोंपी रस्त्याक तेंकून बांदल्यात. हे विशीं स्वेच्छा दखल उच्च न्यायालयान घेवन रस्त्यार अतिक्रमण करपी बांदकामां मोडून उडोवपाचो आदेश दिल्लो. ह्या आदेशाक पाळो दिवन ही झोपडपट्टी मोडून उडोवपाची मागणी आमी केल्या, अशी म्हायती बोरकार हांणी दिली.
पंचायत संचालनालयान 2002 त ह्यो खोंपी मोडून उडोवपाचो आदेश दिल्लो, पूण त्या आदेशाची कसलीच अंमलबजावणी जावंक ना. तशेंच वर्स 2022 त आमी एक निवेदन लेगीत भेटयल्लें. आतां उच्च न्यायालयान पंचायत संचालनालय आनी जिल्होधिकाऱ्यांक हे विशींचे निर्देश दिल्यात, पूण अजून मेरेन हे झोपडपट्टी विशीं संचालनालयान अनुपालन अहवाल दिला काय असो प्रस्न विचारल्यार अधिकाऱ्या कडेन जाप ना, असो आरोप बोरकार हांणी केलो. पंचायतींत सचीव एका जाग्यार तीन वर्सां परस चड तेंप आसपाक शकना. पूण तीन वर्सां परस अदीक काळ जालो, कुडका पंचायतींत तोच सचीव आसा. थंय चेपण हाडून व्होट बँक पॉलिटिक्स चल्लां. पंचायतीची मनमानी चल्ल्या, हे खातीर आतां आमी पंचायत मंत्री मॉवीन गुदिन्हो हांच्या फाटल्यान लागतले. आमी शुक्रार मेरेन ही झोपडपट्टी मोडून उडोवपाचो वेळ दिला, ना जाल्यार आमी फुडलीं पावलां उखलतले, अशीं शिटकावणी बोरकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
