भांगरभूंय | प्रतिनिधी
भांगरभूंय । प्रतिनिधी
वास्कोः कुठ्ठाळेची फेरीबोट जेटी पर्यटन वेव्हारा खातीर दिवपाच्या न्हंय येरादारी खात्याचे (आरएनडी) येवजणेक कुठ्ठाळी पंचायत मंडळ तशेंच कुठ्ठालेचो आमदार आन्तोन वास हांणी विरोध केला. पर्यटनाच्या नांवां खाला कुठ्ठाले झुवारी न्हंयेंत कॅसिनो हाडटले अशी तांकां भिरांत आसा. आमदार आनी पंच मंडळान सोमाराक सकाळी कॅप्टन ऑफ पोर्टाची हे संबंदांत भेट घेतली. आरएनडीचे हे येवजणे संबदी जोड पळोवणी करपाची मागणी केल्या.
कुठ्ठाळी पंचायत मंडळ तशेंच आपल्याक विस्वासांत घेनास्तना जेटी पर्यटना खातीर दिवपाचें आरएनडीन थारायलें. ताका विरोध करपी पत्र आपणे खात्याक धाडलां अशें आन्तोन वास हांणी सांगलें. जेटी संबंदी दिसाळ्यांत जायरात आयल्या तें पळोवन हांवें ताची म्हायती कुठ्ठाळेच्या सरपंचाक दिली. पंचायत मंडळाक हाची कसलीच कल्पना ना अशें सरपंच सोनिया परेरा हिणे सांगलें. एक वर्सां आदी कुठ्ठाळेची जेटी पर्यटना खातीर दिवपाचें धारिल्ले तेन्ना थळाव्या लोकांनी ताका विरोध केल्लो हाची वास हांणी याद करून दिली. पर्यटन वेव्हार सांबाळपा इतली कुठ्ठाळे जेटीची तांक ना. पर्यटना नांवांन हेर कारणां खातीर तिचो वापर करपाचो सरकाराचो विचार आसपाक शकता असो लोकांक दुबाव आसा.
कॅप्टन ऑफ पोर्ट जेटीच्या हस्तांतरणा विशीं तपशील दिवपाक तयार ना. कुठ्ठाळे कॅसिनो हाडून रातभर संगीत पार्ट्यो करतले अशी थळाव्या लोकांक भिरांत आसा. हाचे पयलीं बोटींनी अश्यो पार्ट्यो जाताल्यो तेन्ना लोकांनी तांचेर फातर शेवटिल्ले अशी म्हायती वास हांणी दिली. आरएनडी पंचायत मंडळ आनी आमदाराक विश्वासांत घेना तेन्ना तांच्या हेता विशी दुबाव घेवपा सारकें आसा अशें तांणी सांगलें.
कुठ्ठाळे वाठारांत नुस्तेमारी लोक आसात. जेटीचें खाजगीकरण केल्यार तांच्या वेवसायाचेर खर परिणाम जातलो. जे तरेन आरएनडी सगले गुपीत दवोरता. जेटीच्या आवाठांत कसले वेव्हार चलतले हे विशी ते कांयच सांगनात. हे सगळें दुबाव घेवपा सारकें आसा अशें सरपंच सोनिया परेरान सांगलें. जेटीच्या वेव्हाराक आमचो विरोध आसा. हे संबंदी ग्रामसभा घेतले अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.