भांगरभूंय | प्रतिनिधी
मुरगांव, प्रतिनिधी: कुठ्ठाळी- कोन्सुवा राष्ट्रीय महामार्गाचेर रिक्षा आनी दुचाकीच्या अपघातांत, दुचाकी चालक फ्रान्सीस डिसिल्वा (५०) हाका आक्ताक मरण आयलें. जाल्यार फाटल्यान बशिल्लो फ्रान्सीस हांचो पूत ऍरॉन जखमी जालो.
चड म्हायती प्रमाण, वेर्णे पुलीस स्टेशनाचे निरीक्षक नेल्सन कुलासो हांणी दिल्ले म्हायती प्रमाण, फ्रान्सीस डिसिल्वा आपल्या पुता वांगडा सांकवाळ राष्ट्रीय महामार्गा वयल्यान कोन्सुवा वताले. तेन्ना वेर्णा ते सांकवाळ वचपी रिक्षा आनी फ्रान्सिसाचे दोन चाकी मदीं अपघात जालो. ह्या अपघातांत फ्रान्सीसाक जाग्यारूच मरण आयलें. फाटल्यान बशिल्लो ताचो पूत ऍरॉन हो जखमी जालो. ताका मडगांव दक्षीण गोंय जिल्हो हॉस्पिटलांत उपचारा खातीर दाखल केला.
अपघाताचे सुवातेर कुठ्ठाळेचे आमदार आंतोनियो वास दाखल जाले. कुठ्ठाळी – कोन्सूवा राष्ट्रीय महामार्गाचेर सरकारान सिग्नल आनी स्पिडब्रेकर बसोवपाची मागणी आमदार वास हांणी केल्या. वेर्णा पुलिसांनी अपघाताचो पंचनामो केलो. फ्रान्सीस डिसिल्वा हांची कूड पोस्टमार्टमा खातीर दक्षीण गोंय जिल्हो हॉस्पिटलांत धाडल्या. उपनिरीक्षक आनंद गांवकार फुडलो तपास करतले.
मजगतीं, हाचे पयलीं वेर्णा ते सांकवाळ – कोन्सूवा राष्ट्रीय महामार्गाचेर खूब अपघात जाल्यात. ह्या रस्त्यार जावपी अपघातांचेर नियंत्रण दवरपाक राज्य सरकाराच्या सहकार्यान कितेंय उपाय करतले अशें आमदार वास हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
