भांगरभूंय | प्रतिनिधी
फोंडेंः कुट्टी-खांडेपारा राष्ट्रीय म्हामार्गार धांवत्या खडी ट्रक खाला चिड्डून अशोक नायक (47, गांवठण-खांडेपार) ह्या दुचाकी चालकाक जाग्यारूच मरण आयलें. ह्या अपघात प्रकरणांत ट्रक चालक फाजील अहमद फराश (43, कर्नाटक) हाका पुलिसांनी अटक केल्या.
पुलिसांनी दिल्ले म्हायती प्रमाण, शेनवारा सकाळीं 10.45 वराच्या सुमाराक जीए-05-एच-0821 क्रमांकाचे स्कुटरी वयल्यान अशोक नायक फोंडेंचे दिशेन वतालो. त्याच वेळार फाटल्यान जीए 08 यू 3648 क्रमांकाचो खडी व्हरपी ट्रक तेच दिशेन वतालो. ह्या वेळार स्कुटर चालकाचें नियंत्रण गेल्ल्यान तो रस्त्यार पडलो आनी फाटल्यान येवपी ट्रक ताचे वयल्यान गेल्ल्यान ताका जाग्यारूच मरण आयलें.
अपघाताची म्हायती मेळ्ळे उपरांत फोंडें पुलिसांनी घडणूक सुवातेर धांव घेतली. अपघाताक लागून कांय वेळ फोंडें ते बेळगांव मार्गा वयली येरादारी ठप्प जाली.
अपघातांत मरण आयिल्ल्या अशोक नायक हाका 5 आनी 3 वर्सांची दोन भुरगीं आसात. पुलिसांनी अपघाताचो पंचनामो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
