भांगरभूंय | प्रतिनिधी
ड्युटीचेर गैरहाजीर राविल्ल्या पुलिसांचेर केल्ले उपकार थारले मारक
भांगरभूंय । प्रतिनिधी
म्हापशें: सांगोल्डेंच्या किसमूर सांगोल्डा ह्या रॅस्टोरॅण्टांत कथीत वाडीव बिला वयल्यान बोवाळ करपी आठ पुलिसांचेर निलंबनाची कारवाय जाल्या. जाल्यार ड्युटीचेर आसतना पार्टींत वांटेकार जाल्ल्या पुलीस चालकाचेर गैरहाजीर आशिल्ल्याचो शेरो मारूंक नाशिल्ल्यान एका उपनिरिक्षकाचेर लेगीत कारवायेक फुडो करचो पडला.
कळंगूटचे पुलीस उपनिरिक्षक विकास गावडे हाची उत्तर गोंय राखीव विभागांत बदली केल्या. हे पार्टीचो मुख्य आयोजक सुनील म्हाळशेकार हो पुलीस चालक कॉन्स्टेबल मंगळारा 26 जुलयाक ड्युटीचेर आशिल्लो. तरी लेगीत तो ड्युटी सोडून हे पार्टेंत वांटेकार जाल्लो. तो कर्मचारी ड्युटीचेर गैरहाजीर आसतनाय तसो शेरो ड्युटी बुकाचेर मारूंक नाशिल्ल्याच्या कारणा वयल्यान विकास गावडे हाका कारवायेक फुडो करचो पडला.
मंगळारा 26 जुलयाक रातच्या 9.30 ते 10.30 ह्या वरभराच्या काळांत हो प्रकार घडलो. हो सगळो प्रकार रॅस्टोरॅण्टाच्या सीसीटीव्ही कॅमेरांत बंद जाला. निलंबीत पुलीस कर्मचारी आनी हेर दोग जाण मेळून धा जाणांचो पंगड रॅस्टोरॅण्टांत पार्टी खातीर आयिल्लो. पायंट बियराच्यो 32 बाटल्यो तशेंच चिकन, सिंगटा, रोटी आनी हेर पदार्थ तांणी पचयले. ते आदींच सगळे सोऱ्याचे घुंवळेंत आशिल्ले.
ह्या गिरायकांचें 8 हजार रुपया बील जालें. तें चड आसा असो तांणी दावो केलो आनी जीएसटीच्या नांवान चड बील काडलां अशें म्हणीत निलंबीत पुलिसांनी रॅस्टोरॅण्टाच्या कर्मचारी आनी धनया कडेन वाद केलो. तांका बुरश्यो गाळी घातल्यो. रॅस्टोरॅण्ट मोडपाचीय धमकी दिली. मेजा वयली रोटी लेगीत कावंटराचे दिशेन मोखून मारली. सोऱ्याचे घुंवळेंत आशिल्ल्या ह्या पुलिसांनी बोवाळ मारीत रॅस्टोरॅण्टांत धुमाकूळ घातलो. ताका लागून हेर गिरायक लेगीत भियेले. समजावन लेगीत कळना हें पळोवन रॅस्टोरॅण्टाच्या धनयान साळगांव पुलिशेक आपयले. पुलिसांन हातूंत हस्तक्षेप करून बील फारीक केले उपरांत ते थंयच्यान गेल्ले.
निलंबीत पुलीस आतां करतात दया याचना…
निलंबनाची कारवाय जाल्ल्यान मारिल्लो सोरो धपक्यान देंवला. तातूंतल्या कांय जाणांनी घरकान्न आनी घरच्यां सयत येवन रॅस्टोरॅण्टाच्या धनयाची माफी मागून दयायाचना केली. आपली चूक जाल्या, आमकां माफ कर, अशी दया याचना ते रॅस्टोरॅण्टाचे धनी प्रशील नेत्रावळकार हांचे कडेन करतात. पूण नेत्रावळकार हांचे राजकारणी सोयरे मात आपले भुमिके कडेन ठाम रावल्यात. अशा पुलिसांक ख्यास्त जावपाकूच जाय, असो निश्चेव तांणी केल्ल्याचें कळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
