कितें तरी अर्दवट आसा

भांगरभूंय | प्रतिनिधी

कथा

श्रद्धा गरड

8669495781

–

अभिलाश ताका जाय आशिल्लें तशें सोबीत अर्थपूर्ण जिवीत जगपाक गुरुच्या सोदांत आशिल्लो. अभिलाशाच्या मनाक पडिल्ल्या प्रस्नाची जाप ताका मेळ्ळी. अभिलाशान, शिरडी श्री साईबाबांक आपलो गुरू म्हूण स्विकारलो आनी ….

–

अभिलाश एक युवक. तो एका चार तारांकीत रॅस्टॉरंटाचो मॅनेजर. ताची बायल अंजली दिसपाक खूब सोबीत आनी स्वभावान खूब समजुतदार. अंजली एका कॉलेजींत मानसशास्त्र विशय शिकयतालें. तांकां एक गुडगुडीत चार वर्सांचो चलो आशिल्लो. अभिलाश आपल्या करियरांत यशस्वी आशिल्लो तशेंच आपल्या संवसारांत सुखी आशिल्लो. तरी लेगीत अभिलाशाक आपल्या जिवितांत कितें तरी चुकिल्ले भशेन दिसतालें. जिवितांत कितें तरी अर्दवट आसा अशें ताका दिसतालें. आपूण जगता त्या जिविताक आजून अर्थ मेळूंक ना अशें ताका दिसतालें. खूब विचार करून लेगीत ताच्या प्रस्नाची जाप ताका मेळूंक ना.

एक दीस तिनसांजच्या वेळार अभिलाश नायट शिफ्टीक कामार आसतना ताका ताच्या व्हडल्या भावाचो फोन आयलो. तांचो बापूय बरो ना, ताचें कंडीशन क्रिटीकल आसा. बापूय हॉस्पिटलांत आय. आय. सी. यूंत (IICU)  ऑक्सिजनाचेर आसा. अभिलाश रॅस्टॉरंटांत, ताच्या पात्रांवाक कळयलें आनी हॉस्पिटलांत धांवलो. आय. आय. सी. यूंत ऑक्सिजनाचेर बापायक पयलेंच फावट अशे अवस्थेंत पळोवन तो भावूक जालो आनी ताच्या दोळ्यांतल्यान दुकां व्हांवलीं. अभिलाश आय. आय. सी. यूच्या भायर येवन एका बांकार बसलो.

दुसऱ्या दिसा सकाळचो ताच्या वांगडा काम करपी नवो वांगडचो मॅनेजर विलास, अभिलाशाच्या बापायची खबर घेवपाक हॉस्पिटलांत आयिल्लो. विलास हॉस्पिटलान येतना, शिरडी श्री साईबाबांचे मुर्तीक लायिल्ली शाल आनी श्री साईबाबांची कथा सांगपी एक पुस्तक आनी स्तवनमंजिरी एक ल्हानशी पुस्तिका घेवन आयिल्लो. विलास हॉस्पिटलांत पावतकच अभिलाशा कडेन पयलीं ताच्या बापायची वासपूस केली. मागीर शाल अभिलाशाच्या हातांत दीत ताका सांगलें, “ही शिरडी श्री साईबाबांचे मुर्तीक लावन हाडिल्ली शाल म्हजे कडेन आसली. हांव शिरडी गेल्लों तेन्ना हांवें ही शाल हाडिल्ली, कारण म्हाका श्री साईबाबांचेर विश्वास आसा आनी तसो अणभव आसा. श्री साईबाबांचेर विश्वास दवरून तूं ही शाल तुज्या बापायचे छातयेर दवर, श्री साईबाबा तुका पावतलो.” विलासान वांगडा हाडिल्लें पुस्तक अभिलाशाच्या हातांत दीत ताका सांगलें, “तुका वेळ मेळटा तेन्ना श्री साईबाबांची कथा वाच, बाबा तुका मार्ग दाखयतलो.” विलास दुसरी ल्हानशी एक पुस्तिका अभिलाशान दीत सांगलें, “ही स्तवनमंजिरी. श्री साईबाबांक नमस्कार कर आनी सद्दां वाच.” शाल आनी पुस्तक दिवन विलास थोड्या वेळान थंयच्यान गेलो. अभिलाशान शाल आनी पुस्तक आपल्या व्हडल्या भावाक दाखयलें आनी विलासान कितें सांगलां तें ताका सांगलें. अभिलाशाच्या व्हडल्या भावाक देवाचेर खूब विश्वास आशिल्लो. तशेंच श्री साईबाबांचेर बरयिल्लीं कांय पुस्तकांय ताणें वाचिल्ली. म्हूण ताणें अभिलाशाक बापायचे छातयेर ती शाल दवरपाक सांगली. अभिलाश आय. आय. सी. यूंत. ताचो बापूय आसा थंय गेलो आनी बापायचे छातयेर ती शाल दवरली. आय. आय. सी. यूंतल्यान भायर येवन तो कॉरिडोरांत बांकाचेर बसलो. सांजवेळ जावपाक आयिल्ली तेन्ना हॉस्पिटलांतल्या वॉर्ड बॉयन ताच्या बापायक आय. आय. सी. यूंतल्यान भायर हाडून जनरल वॉर्डांत दवरलो कारण ताच्या बापायची भलायकी आतां पयलीं परस खूब सुदारिल्ली. जनरल वॉर्डांत ताचो बापूय अभिलाश आनी ताच्या व्हडल्या भावा कडेन उलयलो. अभिलाशाक हें पळोवन अजाप दिशिल्लें.  श्री साईबाबांचे मुर्तीक लायिल्ली शाल बापायचे छातयेर दवरतकच क्रिटीकल कंडिशनांतल्यान बापूय भायर सरलो आनी अभिलाशाचो श्री साईबाबांचेर भावार्थ वाडलो. अभिलाशाच्या व्हडल्या भावान अभिलाशाक सांगलें, “शिरडींत श्री साईबाबांची समाधी आसा. समाधीचें दर्शन घेवपाक भावीक शिरडी वतात. कांय म्हयन्यां उपरांत आमी सगळीं वांगडा मेळून आमच्या डॅडीक घेवन शिरडी श्री साईबाबांचें दर्शन घेवन योवया,” अशें अभिलाशाच्या व्हडल्या भावान अभिलाशाक सांगलें. अभिलाशाच्या बापायची भलायकी सुदारली आनी कांय दिसांनी ताच्या बापायक हॉस्पिटलांतल्यान डिसार्च मेळ्ळो. अभिलाशाचो बापूय आपल्या व्हडल्या पुता कडेन म्हणजे अभिलाशाच्या व्हडल्या भावा कडेन तांच्या मूळ घरांत रावतालो. अभिलाशाचो व्हडलो भाव लग्न जाल्लो. ताचो व्हडलो भाव, ताचो आवय-बापूय, व्हडल्या भावाची बायल, ताच्या व्हडल्या भावाक एक चलो आनी एक चली अशें ताचें कुटुंब, मूळ घरांत वांगडा रावतालीं. हॉस्पिटलांतल्यान डिस्चार्ज मेळटकच ताचो बापूय आपल्या मूळ घरा गेलो. अभिलाश आपल्या बायल भुरग्याक घेवन दुसरे कडेन रावतालो.

“श्री साईबाबा कथासार” हें पुस्तक आनी “स्तवनमंजिरी” विलासान हॉस्पिटलांत अभिलाशाक दिल्ली. अभिलाश आतां घरा कडेन आपल्याक वेळ मेळटा तसो तें पुस्तक आनी “स्तवनमंजिरी” वाचतालो. “श्री साईबाबा कथासार” हें पुस्तक वाचतना अभिलाशाचो श्री साईबाबांचेर भावार्थ वाडत गेलो. अभिलाशाच्या जिवितांतलो उमेदीचो दीस उजवाडलो, ताचो जल्मदीस. अभिलाशा वांगडा काम करपी विलासान “श्री साईसच्चरीत ग्रंथ” जल्म दिसाची भेट म्हूण ताका दिली.

अभिलाशान पयलेंच फावट “श्री साईसच्चरीत ग्रंथ” ताका वेळ मेळटा तसो, ताणें वाचपाक सुरवात केली. सादे काणयांचें पुस्तक हातांत घेवन सोफार बसून वाचतात तशें ताणें, “श्री साईसच्चरीत ग्रंथ” सोफार बसून वाचलो. ह्या ग्रंथांत 53 अध्याय आसात. अभिलाश केन्ना दिसाक एकूच अध्याय वाचतालो तर केन्ना एका दिसांत सकाळ सांज मेळून पांच-स अध्याय वाचतालो. आयतारचो घरा आसता तेन्ना सकाळ – सांज मेळून आठ-णव अध्याय वाचून सोंपयतालो. अशें करून अभिलाशान, ग्रंथांतलें 53 अध्याय वाचलें. श्री साईसच्चरीत ग्रंथांत कथा ओवी रुपान आसात. अभिलाशान पयलीं, श्री साईबाबा कथासार पुस्तक वाचिल्लें म्हणून ताका श्री साईसच्चरीत ग्रंथांत ओवी रुपान आशिल्ल्यो कथा खूब बरे तरेन समजल्यो. श्री साईसच्चरीत ग्रंथ वाचून जातकच ताका त्या ग्रंथांतल्यान समजलें ताणें जशें सोफार बसून ग्रंथ वाचलो तसो हो ग्रंथ वाचप नासता. हो ग्रंथ कसो वाचप तें त्या ग्रंथांत बरयलां. श्री साईसच्चरीत ग्रंथ वाचून जातकच ताच्या अंतरमनांत एक वेगळीच खोस ताणें अणभवली. ह्या ग्रंथांतल्यान ताका समजता श्री साईबाबा शिरडींत केन्ना आनी कसो आयलो. श्री साईबाबांचो संदेश आनी आपल्या भक्तांक निर्भय रावपाक दिल्ली अकरा वचना ताका समजतात. “श्री साईसच्चरीत ग्रंथ” वाचून जातकच अभिलाशाक जाणवता, आपूण आतां मेरेन जिवीत कशें जगपाचें ह्या प्रस्नाची जाप सोदतालो. ताच्या मनाक जाय तशी जाप ताका ह्या ग्रंथांत मेळ्ळी. श्री साईबाबान सांगला, दुसऱ्यांच्यो चाडयो करूंक जायना. दुसऱ्यांच्यो चाडयो करप म्हणजे दुसऱ्यांची हळशीक खावप. सोबीत जिवीत जगपाक श्री साईबाबान शिकवण दिल्या. आपलें जिवीत जगपाक अशेच तरेच्या मार्गदर्शनाच्या सोदांत आपूण आसलो, हें ताका जाणवता.

ग्रंथ वाचून जातकच ताका जें ज्ञान समजलें, तो आध्यात्मीक अणभव ताणें आपले बायलेक सांगलो. तशेंच हो ग्रंथ सप्ताह पारायण करून वाचूंक जाय अशें त्या ग्रंथांत बरयलां. ह्या ग्रंथाचें आतां ताका सप्ताह पारायण करूंक जाय अशें अभिलाशान आपल्या बायलेक सांगलें. अभिलाशाच्या तोंडांतल्यान ताचे बायलेन पयलेंच फावट आध्यात्मीक गिन्यान आयकलें. अंजलीक हो ग्रंथ वाचपाक अभिलाशाच्या अणभवांतल्यान उर्बा मेळ्ळी. विलास जाणें हो ग्रंथ अभिलाशाक दिल्लो ताका अभिलाशान सप्ताह पारायण कशें करूंक जाय तें विचारलें. विलासान ताका ह्या ग्रंथाचें सप्ताह पारायण कशें करतात तें अभिलाशाक समजावन सांगलें. अभिलाशान पयलीं, श्री साईसच्चरीत ग्रंथाचें सप्ताह पारायण करपाक मनाची तयारी करून मागीर सप्ताह पारायणाक सुरवात केली. नेमान सात दिसां भितर म्हळ्यार एका आठवड्या भितर हो ग्रंथ वाचून पुराय करप म्हणजेच सप्ताह पारायण. दर दिसा कितलें अध्याय वाचप, ग्रंथ वाचपाक सुरवात करचे पयलीं कितें करपाक जाय तें त्या ग्रंथाच्या अखेरेक बरयल्लें आसा. तशेंच दर दिसा स्तवनमंजिरी वाचून मागीर अध्याय वाचनाक सुरवात करप हाची सगळी म्हायती त्या ग्रंथांत बरयल्ली आसा. अभिलाशाक सप्ताह पारायणाचें गिन्यान सारकें समजतच, सात दिसां भितर वाचन सारकें करप शक्य आसा हें अभिलाशाक पटलें. आपलो हो निर्णय ताणें आपले बायलेक सांगलो.

अभिलाशान सकाळीं फुडें बेगीन उठून सदचे वरी देवार्‍यांत देवाची पुजा करून जातकच सप्ताह पारायणाक सुरवात केली. अभिलाशाक ताच्या कामाचेर, केन्ना दिसाची ड्युटी आसताली तर केन्ना रातची ड्युटी आसताली. सकाळची ड्युटी आसताली तेन्ना अभिलाश सकाळचो सदचे परस खूब बेगीन उठून, ज्या दिसा जितले अध्याय वाचूंक जाय, तितले अध्याय तो वाचतालो, आनी मागीर कामाक वतालो. सात दीस रोखडेंच सोंपले. अभिलाशाचें सप्ताह पारायण जाल्या उपरांत, मागीर कांय दिसांनी, अभिलाशाच्या मार्गदर्शनान, ताचे बायलेन “श्री साईसच्चरीत ग्रंथ” चें सप्ताह पारायण केलें. ग्रंथ वाचतकच अभिलाशाचे बायलेक अंतर्मनाक एक वेगळेंच समाधान मेळ्ळें. ग्रंथ वाचतकच दोगांयकूय एक गजाल समजली, शिरडी तोच पावता जाका श्री साईबाबा आपयता. भक्ती करतना देवाचेर श्रद्धा आनी वांगडा सबुरी दवरूंक जाय हेंच श्री साईबाबान सांगला. श्रद्धा म्हणजे परमेश्वराचेर विश्वास आनी सबुरी म्हणजे पाशिंयेंस. शिरडी श्री साईबाबांचेर मनांत श्रद्धा आनी वांगडा सबुरी दवरून अभिलाश आनी ताची बायल शिरडी वचपाची वाट पळोवंक‌ लागलीं.

खूब म्हयन्यां उपरांत अभिलाश आनी ताच्या व्हडल्या भावान, आपल्या आवय – बापायक आनी आपल्या बायल भुरग्यांक घेवन शिरडी श्री साईबाबांच्या दर्शनाक वचपाचें थरयलें. तो दीस उजवाडलो. पुराय कुटुंब मेळून शिरडी श्री साईबाबांच्या दर्शनाक पावली. तीं सगळीं जाणा दोन दीस थंय रावलीं. सकाळ-सांज श्री साईबाबांच्या समाधी मंदिरांत जावपी आरतीचो आनंद तांच्यांनी घेतलो. अभिलाश ताका जाय आशिल्लें तशें सोबीत अर्थपूर्ण जिवीत जगपाक गुरुच्या सोदांत आशिल्लो. अभिलाशाच्या मनाक पडिल्ल्या प्रस्नाची जाप ताका मेळ्ळी. अभिलाशान, शिरडी श्री साईबाबांक आपलो गुरू म्हूण स्विकारलो आनी श्री साईसच्चरीत ग्रंथांत जी शिकवण श्री साईबाबान सांगल्या ती ताणें आपणायली आनी आपलें जिवीत जगूंक लागलो. अभिलाशाच्या जिवितांत जें अर्दवट आशिल्लें तें आतां पुराय जाल्लें.