काळीज आनी साहित्या मदीं परस्पर संबंद

भांगरभूंय | प्रतिनिधी

प्रा. डॉ. कस्तुरी मोहन पै: प्रकाश नायक हांच्या दोन पुस्तकांचें जालें प्रकाशन

सावयवेरें: काळीज आनी साहित्या मदीं परस्पर संबंद आसा, मोग आसा. साहित्य संगीतांत काळीज बरें उरता. हिंदुस्तानी संगीत म्हत्वाचें. देखून हिंदुस्तानी संगीतांतलें विलंबीत आनी द्रूत संगीत कोंकणी भाशेंतूय आसूंक जाय. हाका लागून भाशेक गिरेस्तकाय येता. कर्नाटकांत सुमार 10 लाख कोंकणी उलोवपी आसात. हे भाशेंत शिक्षण मेळप म्हत्वाचें असो उल्लेखूय तांणी केला, अशें नामनेचे लेखक डॉ. कस्तुरी मोहन पै हांणी सांगलें. 

अमराय सावयवेरेंचे कोंकणी लेखक आनी कवी प्रकाश नायक हांच्या 60 व्या वाडदिसा निमतान तांणी बरयल्ल्या ‘मोडकूळ’ ह्या कवितां झेल्याचें आनी ‘साग्रसंगीत’ हो लेख संग्रह ह्या दोन पुस्तकांचो प्रकाशन सुवाळो सावयवेरेंच्या मदनंत  क्रिकेट क्लबाच्या आंगणांत जालो. ह्या वेळार प्रा. डॉ. कस्तुरी मोहन पै मुखेल सोयरे ह्या नात्यान उलयताले. 

 माचयेर सुवाळ्याचे अध्यक्ष सुवातेर ज्ञानपीठ पुरस्कार मानेली दामोदर मावजो हाजीर आशिल्ले. तशेंच कोंकणी कवयित्री ग्वादालूप डायस, लेखक आनी भजनी कलाकार दुर्गाकुमार नावती, आयोजन समितीचे अध्यक्ष आनी लोककलाकार कांता गावडे, रामकृष्ण जल्मी, राजतिलक नायक, गौरवमुर्ती प्रकाश नायक आनी रेखा नायक हाजीर आशिल्ले. 

    अध्यक्ष सुवाते वयल्यान दामोदर मावजो हांणी, प्रकाश नायक हांणी कोंकणी भाशेंत जायतीं पुस्तकां बरोवन कोंकणी साहित्यांत भर घातल्या. शिक्षक सेवेंतल्यान ते निवृत्त जाल्ल्यान ह्यान फुडें तांणी आनीक कोंकणी साहित्य बरोवचें आनी कोंकणी भास समृद्ध करची अशें तांणी म्हणलें. 

ह्या वेळार प्रकाश नायक हांणी आपलें मनोगत उक्तावन आयोजन समितीचे उपकार मानले.

    प्रास्तावीक कांता गावडे हांणी केलें. अंबर नायक, अक्षय नायक, प्रशांत नायक, आनंद नायक, विठ्ठल नायक, प्रदीप नायक हांणी मानेस्तांक रोंपे भेटोवन येवकार दिलो. मानेस्तां हस्तुकीं दिवली पेटोवन उक्तावण जालें. ह्या वेळार प्रकाश नायक हांच्या ‘मोडकूळ’ कविता झेल्याचेर ग्वादालूप डायस आनी ‘साग्रसंगीत’ पुस्तकाचेर दुर्गाकुमार नावती हांणी आपले विचार मांडले. मानेस्तां हस्तुकीं दोनूय पुस्तकांचें प्रकाशन जालें. 

   प्रकाश नायक हांचो 60 वो वाडदीस ह्या वेळार मनयलो. तशेंच मावजो हांचे हस्तुकीं प्रकाश नायक हांकां फुलां तुरो, श्रीफळ, शाल आनी मानपत्र भेटोवन भोवमान केलो. मानपत्र राजतिलक नायक हांणी वाचलें. साठ पणट्यो पेटोवन बायलांनी प्रकाश नायक हांची ओवाळणी केली. शालिनी गावडे हस्तुकीं रेखा नायक हांची ओटी भरली. पुराय कार्यावळीचें सुत्रसंचालन गौरांग भांडये आनी निमाणें रेखा नायक हांणी उपकार मानले.