भांगरभूंय | प्रतिनिधी
हारुकी मुराकामी हे जपानी भाशेंतले नामनेचे लेखक. तांचें साहित्य वाचकांक एका आगळ्या वेगळ्या जगांत पावयता आनी तातुंतूच तांकां घुस्पावन दवरता. ‘काफ्का ऑन द शोर’ हें एक आगळेंच पुस्तक. लेखकान ही चारशे सुमार पानांची जड कादंबरी 2022 वर्सा जपानी भाशेंत उजवाडाक हाडली. 2005 वर्सा फिलीप गेब्रियल हांणी तिचो इंग्लीश अणकार केलो. ह्या पुस्तकांतल्यान मुराकामी हांचें नांव आनी साहित्य पुराय जगांत गाजलें आनी आंतरराष्ट्रीय मळार तांणी नामना जोडली.
‘काफ्का ऑन द शोर’ हे कादंबरेंत लेखक आमकां एका पंदरा वर्सांच्या तरणाट्याची आनी नाकाटा नांवाच्या पात्राची काणी सांगता. नाकाटा आनी काफ्का हे कादंबरेचें मुखेल पात्र. पुस्तकाचो माथाळो वाचल्यार तातूंत जेश्ठ लेखक फ्रांज काफ्का हांचें विशीं कितें आसतले कांय? अशी कुरियोसदाद जाता, पूण लेखकान आपल्या मुखेल पात्राकूच तें नांव दिलां अशें वाचकांक जाणवता. फ्रांज काफ्का हांचें लिखाण ‘सरियलिस्ट’ शैलींतले. हे शैलींत लेखक वा कलाकार आपले काल्पनीक शक्तेक पालव दिवन, काल्पनीक कथानक तयार करतात वा चित्र काडटात आनी कांय वेळा तें चित्र वा ती काणी पळोवपाक वा वाचूंक विचित्र आसता, पूण तातूंत लेखक कांय समाजीक आनी म्हत्वाच्या विशयांचेर आपले विचार एके रहस्यमय तरेन मांडटात. वाचकांक काणयेचें कथानक रचपा फाटलो हेतू कितें? असो प्रस्न पडटा. लेखकाच्या
मनांत कितें चल्ला तें स्पश्टपणान कळना. वाचक पुस्तक वाचतातूच त्याच बरोबर कथानकांत विणिल्ले विंगड विंगड अर्थ आनी विचार उस्तून काडपाकूय मग्न जातात.
हे काणयेंतलो काफ्का एक पंदरा वर्सांचो भुरगो. कांय कारणां खातीर तो आपलें घर सोडून वता. ल्हान आसतना काफ्का विशीं एक भयानक पूर्वअदमास उजवाडाक येता आनी तें खरें जायत ह्या भंयान तो घर सोडून वता. काफ्का ‘क्रो’ वा एक कावळ्या कडेन उलयता, ताच्या लागीं विचार मांडटा, ताचो सल्लो घेता. हो क्रो काफ्काचेंच अवचेतन मन (subconscious
mind) अशें खूब साहित्यकांचें मत आसा. काणयेंत जाणटो जाल्लो, जाम पडिल्लो, माजरा कडेन उलोवपी नाकाटा आसा. नाकाटा आनी काफ्का एकामेकांक वळखनात तरी पुस्तकाचें निमणे कडेन तांचें नातें जोडूं येता.
हे कादंबरेंत लेखकान सुटसुटीत भास वापरल्या पूण बरोवपाची शैली मात समजुपाक खूब कठीण आसा. कादंबरेंत रचिल्ल्यो ल्हान ल्हान वाक्यां वा काणयो (anecdotes) अजापाचीं आसात. काणयेंत माजरा आसात, माजरां कडेन उलोवपी मनशां आसात, जपानी संस्कृतायेचें बारीक सारीक वर्णन आसा, कावळो आसा आनी कांय अजापाच्यो घडणुकोय आसात. मुराकामीचें हें पुस्तक सोंपोवन
लेगीत सोंपूंक ना, अशें अणभवाक येता.
ही कादंबरी एक बेस बरें, प्रचंड
प्रमाणाचें एक उमाणें अशें म्हणप चुकीचें थारचें ना.
मुराकामी हांची आनिकूय
पुस्तकां इंग्लिश भाशेंत अणकारल्यात. हें पुस्तक बाकीच्या पुस्तकां परस वेगळें, आगळें आनी मन भुलोवपा सारकें. जांकां साहित्य, रहस्य वा कला आनी मानसशास्त्राची आवड आनी तांणी हें पुस्तक वाच्चेंच.
गौरवी केणी खंवटे
7798791183
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
