भांगरभूंय | प्रतिनिधी
दोगां दुबावितां आड गुन्यांव नोंद; दोन मोटारी जप्त
फोंडें: कातरवाडो-उसगांवां आयतारा फांतोडेर 3 वरांचेर रान खात्याच्या अधिकाऱ्यांनी धाड घालून सुमार 20 खैरीचे ओंडके आनी एक सुमो आनी एक झेन मोटार जप्त केली. तशेंच ह्या प्रकरणांत दोगां आड गुन्यांव नोंद केला.
मेळिल्ले म्हायती प्रमाण रान खात्याच्या घोळट्या पंगडान आयतारा फांतोडेर धाड घालून खैरीची तस्करी करपाच्या यत्नांत आसतना दोन वाहनां दिसून आयलीं. हातूंत जीए 08 जे 4152 क्रमांकाची झेन आनी जीए 04 सी 3297 क्रमांकाची टाटा सुमो जप्त केली.
ह्या प्रकरणांत संदेश सूर्यकांत नायक (रा. सांखळी, मूळ. आंबेघांट-सिंधुदुर्ग) आनी ताच्या वांगड्याक अटक केल्या. सोमारा दीसभर दुबावितांची अदीक चवकशी करपाक अधिकारी व्यस्त आशिल्ले.
उपरानपाल अमीत जेमावत हांच्या मार्गदर्शना खाला आरएफओ जोझेफ फर्नांडीस, प्रज्योत नायक, रमाकांत नायक, रानरक्षक सचीन सावंत, देऊ शेटकार, किरण साळगांवकार, राजन गांवकार, कमालाकांत कुट्टीकार आनी संदेश घास्ते हांणी हे कारवायेंत वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
