काणी काणी कोतवा – 6
भांगरभूंय | प्रतिनिधी
हुंदीर, कोबो आनी माजर
एका हुंदीर पील पयलेच फावट आपल्या बिळांतल्यान भायर सरिल्लें. तें हांगा थंय भोंवून भोंवून आपल्या बिळान परतलें. ताचे आवयक ताचो जाल्लो हुस्को. ती ताची वाट पळयताली. बिळांत येना फुडें पिलान म्हणलें, ‘‘आई, हांव ल्हानाचो इतलो व्हडलो ह्याच बिळांत जालों. आयज हांव बिळांतल्यान भायर सरतांच एका नव्याच जगांत पाविल्ले सारकें म्हाका दिसलें. पळयता थंय अजापूच. भायर हांवें एक वेगळीच फौज पळयली.’’
रस्त्या कुशीकच्यान भोंवतना हांवें दोन जनावरां पळयलीं. एक दोन पांयांचें आनी एक चार. दोन पांयांचें आसलें ताचे तकलेर तांबड्या रंगाचो तुरो आसलो आनी ताचो आवाज खरखरीत कसो आसलो. तो जेन्ना मान हालयतालो तेन्ना ताचो तुरोय हालतालो. हांव ताची ही मजा पळयतूच उरलों. इतल्यान ताणें आपले दोनूय हात हालयले आनी नेट्टान आरड मारली. त्या आवाजान म्हजे कान बसले….. आनी आई तूं जाणां? दुसरें जनावर आसलें न्हय तें सामकें शांत आनी सभ्य आशिल्लें. ताच्या आंगांर कोणें तरी रेशमी चादर घातिल्ले भशेन दिसतालें. तें सामकें मोव मोव आसलें. खुबूच सुंदर दिसतालें. ताका पळोवन म्हाका ताचे कडेन इश्टागत करची कशी दिसली.’’
हें सगळें हुंदरीण शांतपणान आयकताली. तिणें आपल्या पिलाक म्हणलें, ‘‘शाण्या, तूं आजून खूब ल्हान आसा. तूं ज्या जनावराक सुंदर आनी शांत म्हणटा तें क्रूर माजर. तें आमचें सगळ्यांत व्हडलें दुस्मान. हुंदराचें मांस ताच्या घोस्ताचें. लक्षांत दवर, फकत सौंदर्य पळोवन इश्टागत केल्यार तूं फटवतलो. कोणायचोय पयलीं मनांतलो हेत वळखुचो आनी मागीरूच ताचे कडेन इश्टागत करची. कळ्ळें?’’
हुंदराच्या पिलान मान हालोवन हय म्हणलें.
देख : भायले सोबीतकायेन मनशाच्या भितरल्या सभावाची परिक्षा घेवप शक्य नासता. म्हणून पयलीं मनशाची वागणूक पळोवची, ताचें मन वळखुचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
