भांगरभूंय | प्रतिनिधी
भांगरभूंय । प्रतिनिधी
काणकोणः पोर्तुगेज राजवटींत 28 डिसेंबर 1922 दिसा सुरू केल्ल्या काणकोणच्या सेंत्रू प्रोमोतोर हे शिक्षणीक संस्थेचें अंदू शती महोत्सवी वर्स. 28 जानेवारीक ह्या वर्साचें उक्तावण गोंयचे राज्यपाल पी एस श्रीधरन पिल्लय हाजें उपस्थितींत जातलें. शती महोत्सवी वर्सा निमतान वर्स भर तरेकवार कार्यावळी आयोजीत केल्यात अशी म्हायती शती महोत्सव आयोजन समितीचे अध्यक्ष विकास देसाय हांणी एके पत्रकार परिशदेंत दिली.
उक्तावण कार्यावळीक काणकोणचे आमदार आनी सभापती रमेश तवडकार, निवृत्त ब्रिगेडियर सुधीर सावंत हाजीर रावतले. काणकोणांत शिक्षणाची वेवस्था नाशिल्ल्यान तालुक्यांतले विद्यार्थ्यांक केंपें, सावड्डें, मडगांव आनी फोडें हांगा शिकपा खातीर वच्चें पडटालें. 1918 वर्साचे हिंवताप म्हामारीक लागून काणकोणच्या कांय विद्यार्थ्यांक फोंड्या मरण आयलें. ते उपरांत काणकोणांतल्यान भायर वचून शिकप कुस्तार जालें. ताका लागून 28 डिसेंबर 1922 दिसा कांय लोकांनी एकठांय येवन सेंत्रू प्रोमोतोर दी इन्स्त्रूसांव हे शिक्षणीक संस्थेची म्हेड रोवली. तिका काणकोण काम्र (पालिका), पर्तगाळ मठ आनी श्रीस्थळ हांगचे श्री मल्लिकार्जुन देवस्थान अर्थीक मजत करतालें. 2 ऑक्टोबर 1923 दिसा हे संस्थेची सरकार दप्तरीं नोंद केली आनी तेन्ना सावन मराठी आनी इंग्लिश माध्यमांतल्यान शिक्षणाची वेवस्था जाली. संस्थेन चार रस्ते- काणकोणा हांगा श्री मल्लिकार्जुन विद्यालय सुरू केलें.
हे शाळेंत शिकिल्ल्या विद्यार्थ्यांनी देश- विदेशांत नामना मेळयल्यांत शती महोत्सवा निमतान ह्या आदल्या विद्यार्थ्यांचो टप्प्या टप्प्यान भोवमान करतले. पयल्या टप्प्यांत ज्या चलयांनी शिकून नांव मेळयलें अश्या 28 बायलांचो भोवमान 28 जानेवारीक मानेस्ताच्या हसुकीं करतले. तातूंत काणकोण तालुक्यांतली पयली गायनॉकोलॉजिस्ट डॉ उमा यशवेंत तिळवे ऊर्फ लालन नगर्सेकार, विंग कमांडर उवेना फर्नांडीस, डॉ सुलभा प्रमोद केणी उर्फ़ सुलभा शिवराय दलाल, डॉ. सीमा चंद्रकांत पोरोब, डॉ. साधना भूतो देसाई ऊर्फ़ साधना शेट्ये, डॉ.सुविधा सुरेंद्र राणे ऊर्फ़ साक्षी नेवगी, मनिषा बाबुसो नायक गांवकर उर्फ़ मनिषा पवार, पूर्णा पांडुरंग फळदेसाई ऊर्फ़ पूर्णा प्रज्योत भगत, मल्लिका धिल्लन देसाय हांचो आसपाव आसतलो.
फेब्रुवारी म्हयन्यात जावपी कार्यावळींत ऍर मार्शल श्री राण मार्गदर्शक म्हणून हाजीर रावतले. मे म्हयन्यांत काणकोण तालुक्यांतल्या माध्यमीक आनी उच्च माध्यमीक शाळाचें प्रतिनिधी आनी पालकांक मार्गदर्शन करपी कार्यावळ जातली. शती महोत्सवा निमतान संस्थेची म्हायती दिवपी दोन पुस्तकांचें प्रकाशन तशेंच मल्लिकार्जुन विद्यालय प्रांगणात शती स्तंभ उबारतले अशी म्हायती संस्थेचे अध्यक्ष शांबा देसाय हांणी दिली. सध्या संस्थेच्या प्राथमीक शाळेंत 135, माध्यमीक शाळेंत 310 आनी उच्च माध्यमीक शाळेंत 240 विद्यार्थी शिक्षण घेतात.
पत्रकार परिशदेंक संस्थेच्या सर्वसाधारण सभेचे अध्यक्ष राजेंद्र देसाय, सचीव पुंडलीक नायक गांवकार, भांडारी रमेश कोमरपंत, कमलाकर म्हाळशी, अनिल देसाई, बाबुसो नायक गांवकार , राम देसाय, सोयरू कोमरपंत, प्रमोद राणे, मनोज नायक गांवकार, भानुदास
नायक गांवकार, अवित नायक गावकर, प्रेमानंद नायक गांवकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.