भांगरभूंय | प्रतिनिधी
म्हत्वाच्यो फायली भिजल्यो
भांगरभूंय । प्रतिनिधी
काणकोण : काणकोण मामलेदार संकुलाचे इमारतींत दुसऱ्या माळ्याचेर उदका पुरवण विभागाचें आनी ताच्या सकयल्या माळ्याचेर विभागीय शेतकी कार्यालय आसा. उदका पुरवण विभागाच्या कार्यालयांतलो नळ शेनवारा सुटयेच्या दिसा सावन चालू उरिल्ल्यान उदका पुरवण विभागांत सगळे कडेन उदक भरले उपरांत तेंच उदक सकयले वटेन आशिल्ल्या शेतकी कार्यालयांत भितर घुसलें.
शेतकी कार्यालयांत उदक घुशिल्ल्यान कार्यालयांतले लॅपटॉप, प्रिंटर तशेंच कृशी कार्डा खातीर शेतकारांनी दिल्ले दस्तावेजाच्यो आनी हेर फायली भिजल्यो. हे संबंदांत शेतकी अधिकारी महेंद्र पागी हांची भेट घेतली तेन्ना तांणी लुकसाण जाल्ल्याचें सांगलें. हेरशी उदक मेळना आनी उदका पुरवण विभाग बरे तरेन उदक पुरवण करिना, अश्यो कागाळी आसतात. मात उदका पुरवण विभागाच्या कार्यालयांतल्यानूच हेर कार्यालयांत उदक घुशिल्ल्यान खऱ्या अर्थान उदका पुरवण विभागाच्या कार्यालयाचें सार्थक जालें, अशी चर्चा थंय जमिल्ल्या लोकां मदीं रंगिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
