भांगरभूंय | प्रतिनिधी
भांगरभूंय । प्रतिनिधी
काणकोणः काणकोण लायन्स क्लबाच्या नवे कार्यकारिणीचो सोपून सुवाळो व्हडा उमेदीन जालो. क्लबाच्या ह्या 42व्या सोपूत सुवाळ्याक मुखेल सोयरे म्हणून उल्हास पै भाटीकार हाजीर आशिल्ले. तशेंच लायन्स क्लबाचे संवसारीक पावंड्या वयले दुरसे राज्य प्रांतपाल मोहन मणेक, विभागीय मुखेली आरती अय्यर, राजू प्रभुदेसाय हाजीर आशिल्ले.
संवसारीक समाजसेवेंच्या वावरांत सातत्य आशिल्लो पंगड म्हणल्यार काणकोण लायन्स कल्ब. काणकोणच्या समाजा कडेन ताचो सामको लागींचो संबंद आसा अशें उल्हास पै भाटीकार हांणी सोपूत सुवाळ्यांत उलयतना सांगलें. ह्या वेळार अस्तमती अध्यक्ष पेट्रिसिया हिणे अध्यक्षपदाची सूत्रां 2022-23 वर्साची समिती अध्यक्ष योगिता वेर्णेकार हिचे सुवादीन केली. मोहऩ मणेक हांनी नव्या पदाधिकाऱ्यां कडल्यान सोपून घेतलो.
क्लबाचे पयले उपाध्यक्ष गौरीश वेर्णेकार, दुसरे उपाध्यक्ष भानुदास नायक गांवकार, सचीव सुनील नायक आनी भांडारी पंकज नायक गांवकार हांणी सोपून घेतले.
काणकोण लियो कल्बाच्या एडोन बार्रेटो (अध्यक्ष), श्रीविद्या कोमरपंत (उपाध्यक्ष), अजीत सिंग (सचीव), भाविका नायक गांवकार (भांडारी) हांणीय सोपून घेतले. अपूर्व नायक गांवकार, सज्जन नायक गांवकार, मनोज नायक गांवकार, कुणाल देसाय, विठोबा वेळीप आनी पनव रांगडेकार ह्या नव्या वांगड्यांक सोपून दिले नवी अध्यक्ष योगिता वेर्णेकारान आपले विचार मांडले.
10वेचे परिक्षेंत काणकोण तालुक्यांत पयले तीन नंबर मेळयल्ल्या आनी 12वेचे परिक्षेंत पयले दोन नंबर मेळयल्ल्या विद्यार्थ्यांचो मुखेल सोयऱ्यांचे हस्तुकीं भेट वस्तू दिवन भोवमान केलो. काणकोणचो नामनेचो समाज वावुरपी राजेंद्र नायक गांवकार हांचोय ह्या वेळार भोवमान केलो.
सोपूत दिवपी अधकारी आनी सोयऱ्यांची ह्या वेळार उलोवपां जाली. कार्यावळीचें सूत्रसंचालन अरूण भट हांणी एड्रिसन टोरीश हांणी केलें. सुरवेक अस्तिमती अध्यक्ष पेट्रिसिया हिणे सगल्यांक येवकार दिलो. नवे सचीव स्पप्नील नायक गांवकार हाणे निमाणे उपकार मानले. राष्ट्रगीतान कार्यावळीचो समारोप केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
