भांगरभूंय | प्रतिनिधी
काणकोण: फाटल्या 20 दिसां पयलीं काणकोण रवींद्र भवनांत पावसाचें उदक भरिल्लें, आनी त्या दिसा सावन रवींद्र भवनांतल्यो कार्यावळी बंद आसात. रवींद्र भवन बंद आशिल्ल्यान काल (मंगळारा) काँग्रेस पक्षाचे दक्षीण गोंय संघटण सरचिटणीस गास्पार कुतिन्हो आनी हेर वांगडी आनी तियात्र मोगींनी नुतनीकरणाचें काम खंय पावलां हाची म्हायती समजून घेवपा खातीर काणकोणचे उपजिल्होधिकारी आनी रवींद्र भवनाचे वांगडी सचीव प्रतापराव नायक गांवकार हांची भेट घेवन तांचे कडेन चर्चा केली.
हे चर्चेंत तांणी रवींद्र भवनांतली एसी चलना, जनरेटर ऑटो स्टार्ट जायना. कॅण्टिनाची वेवस्था ना अश्यो विवीध समस्या निवेदनांतल्यान मांडल्यात.
तुमच्यो समस्यो संबंदीत खात्याक धाडून दितले. तशेंच आनीक एक म्हयनो तंत्रीक कारणा खातीर रवींद्र भवन उक्तें जावचें ना अशें संबंदीत खात्यान आपल्याक पत्रा वरवीं कळीत केलां अशें नायक गांवकार हांणी शिश्टमंडळाक सांगिल्ल्याचें गास्पार कुतिन्हो हांणी पत्रकारांक सांगलें.
ह्या वेळार बायलां मुखेली उर्सिला कॉस्ता, वैष्णव पेडणेंकार, रेमी डायस, प्रवीर भंडारी आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
