भांगरभूंय | प्रतिनिधी
18 वेपाऱ्यांनी अजून रक्कम भरिल्ली ना; तांचेर रोखडीच कारवाय
पालिका मंडळाचे बसकेंत घेतलो निर्णय
काणकोण: काणकोण पालिकेची सुवात भाड्यान घेतिल्ल्या तशेंच पालिकेचीं दुकानां भाड्यान चलोवपी वेपाऱ्यां कडल्यान पालिकेक 52 लाख रुपया येणे बाकी आसा. वट्ट 27 वेपाऱ्यां मदल्या 18 जाणांनी अजून रक्कम भरिल्ली ना, तांचेर रोखडीच कारवाय करतले आनी तीं दुकानां सील करतले असो निर्णय काल (बिरेस्तारा) पालिका मंडळाचे बसकेंत घेतलो.
ही बसका नगराध्यक्ष रमाकांत नायक गांवकार हांच्या फुडारपणा खाला जाली. ह्या वेळार उपनगराध्यक्ष लक्ष्मण पागी, नगरसेवक सायमन रेबेलो, धीरज नायक गांवकार, शुभम कोमरपंत, सारा देसाय, अमिता पागी, गंधेश मडगांवकार, नादीन फर्नांडीस, मुख्याधिकारी मधु नार्वेंकार, पालिका अधिकारी संतोष कोमरपंत, नम्रता देसाय, भारती मडगांवकार, येसो देसाय, अभियंतो दिलकूश गांवकार, कनय देसाय हाजीर आशिल्ले.
धुमाणें कोयर प्रक्रिया प्रकल्पाचें काम निकृश्ट दर्जाचें जालां आनी कांय दीस हो प्रकल्प बंद आशिल्लो. त्या कंत्राटदाराच्या बिलाची रक्कम दिवपाची ताकतीक सत्ताधारी कित्याक म्हूण करतात, तातूंत कितेंय गौडबंगाल जाल्ल्याचो दावो नगरसेवक धिरज नायक गांवकार हांणी केलो आनी त्या कंत्राटदाराची उरिल्ली रक्कम फारीक करची न्हय अशी मागणी केली.
ह्या वेळार नगराध्यक्ष रमाकांत नायक गांवकार आनी नगरसेवक धिरज नायक गांवकार हांचे मदीं बाचाबाची जाली. कंत्राटदारान सगलीं कागदपत्रां पालिकेक दिल्यात आनी ताची रक्कत ही दिवचीच पडटली अशें बसकेंत रमाकांत नायक गांवकार हांणी सांगलें.
गुळें ते चावडी मेरेनच्या रस्त्याचे कुशीक आडसरां आनी फळां विकपी वेपाऱ्यांक कुशीक काडपाची मागणी हे बसकेंत केली.
शॅक्सांक परवानो दिल्ल्यान अंदूं पालिकेक 101 शॅक्सकारां कडल्यान 98 लाख रुपयांचो महसूल मेळ्ळो जाल्यार फाटल्या वर्सा 89 शॅक्सकारां कडल्यान 67 लाख रुपया महसूल मेळिल्ल्याचें नगराध्यक्ष रमाकांत नायक गांवकार हांणी सांगलें.
पालिकेचे कामगार पालिके कडल्यान गणभेस धुवपाचे पयशे घेतात. पूण गणभेस घालून पालिकेंत येनात. तांचेर कारवाय करपाचे संकेत हे बसकेंत दिले.
चावडेर खूबशी सुवात रिती आसा. पूण ती सेटलमेंट झोनांत नाशिल्ल्यान थंय कांयच विकासाची कामां करूंक मेळनात. पूण पाळोळेंची सुवात सेटलमेंट झोनांत आसून लेगीत ती सुवात सीआरझॅड क्षेत्रांत येत आशिल्ल्यान थंय काम करपाक अडचण येता. ताका लागून रिजनल प्लॅन परतून उक्तो करपा संबंदी काणकोणचे आमदार तशेंच संबंदीत मंत्र्याक विनंती करतले अशें नगराध्यक्ष रमाकांत नायक गांवकार हांणी सांगलें.
काणकोण पालिकेचे मालकीचो रस्तो एका इमारत धनयान आपली इमारत बांदतना आपल्या प्लॅनांत दाखयला आनी ह्या इमारती खातीर ओकुपन्सी दाखलो दिवपा खातीर अर्ज केला. ते इमारतीक ओकुपन्सी कशी दिवची असो प्रस्न व्यक्त करून पालिका अभियंत्यान ताचेर अहवाल तयार करून पालिकेक दिवचो आनी कांय अटी घालून ताचेर निर्णय घेतले अशें रमाकांत नायक गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
