भांगरभूंय | प्रतिनिधी
काणकोणः आपल्या हद्दींतल्यो दर्या वेळो नितळ दवोरपाचें काम करपी काणकोण पालिका मंडळाक दिव्याज फावंडेशन आनी भामला फावंडेशनाचो ‘ग्रीन क्रुसेडर’ पुरस्कार फावो जालो. मिरामार- पणजे हांगा सोमाराक जाल्ले क्लिनेथॉन कार्यावळींत मुख्यमंत्री डॉ प्रमोद सावंत हांणी दिव्याज फांवडेशनाची संस्थापक आनी महाराष्ट्राचे उप मुख्यमंत्री देवेंद्र फडणवीस हांची घरकान्न अमृता फडणवीस आनी भामला फावंडेशनाचे संस्थापक असिफ भामला हाचे उपस्थितींत हो पुरस्कार काणकोण पालिका मंडळाचो नगराध्यक्ष रमाकांत नायक गांवकार हांका भेटयलो.
15 हजार लोकसंख्या आशिल्ल्या पालिकांचे गटांत काणकोण पालिका मंडळाक नितळसाण दवोरपाच्या वावराक लागून हालींच नवी दिल्लींत स्वच्छता लीग पुरस्कार फावो जाल्लो. देशांतल्या 1850 पालिकां मदल्यान ह्या पुरस्कारा खातीर काणकोण पालिका मंडळाक वेचून काडिल्लें.
दर्या वेळ नितळ दवोरपाचें उत्कृश्ट काम केल्ले खातीर मुख्यमंत्री डॉ सावंत हांणी नगराध्यक्ष रमाकांत नायक गांवकार आनी तांच्या पंगडाची तोखणाय केली. ह्या वेळार केल्ल्या भाशणात बॉलिवूड अभिनेतो जॅकी श्राफ हांणी आमी आमची कूड जशी नितळ दवोरतात तसोच लोकांनी आपलो वाठार नितळ दवोरपाक जाय अशें सांगलें. समाज सेवेचे भावनेन आमी दिव्याज फावंडेशनाची स्थापणूक केल्या. लोकांनी व्हडा प्रमाणांत नितळसाण दवोरपाच्या वावरांत वांटो घेवचो हो आमचो संदेश आसा, अशें अमृता फडणवीसान सांगलें. सगळ्या गजालींक पर्याय आसा. आमचे धरतेक तो ना, तेन्ना आमी सगळ्यांनी ती सुरक्षीत दवोरपाक जाय अशें बॉलिवूड कोरोग्राफर रेमो डिसोझा हांणे सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
