काणकोणात 5 पंचायतींचेर भाजपाचो बावटो आदले सरपंच देवेंद्र नायक आनी दया गांवकार हारले

भांगरभूंय | प्रतिनिधी

भांगरभूंय । प्रतिनिधी
काणकोणः काणकोण तालुक्यांत पांच पंचायतींनी भाजप समर्थक उमेदवारांक जैत मेळ्ळ्या. पैंगीण पंचायतीच्या आमोणे वॉर्डांतल्या काणकोणचो आमदार आनी सभापती रमेश तवडकार हांची घरकान्न सविता तवडकार जैतिवंत जाली. पैंगीण पंचायतीचें सरपंचपद बायलां खातीर राखीव आशिल्ल्यान ताचेर आपूण दावो करतली अशें तिणे सांगला.
श्रीस्थळ पंचायतीचे फाटल्या 30 वर्सां सावन पंच आनी सरपंच म्हणून काम करपी देवेंद्र नायक, दत्ता गांवकार, खोतीगांवचो आदलो सरपंच उमेश ऊर्फ दया गांवकार, खोला पंचायत वेंचणुकेत देंविल्लो आदलो जिल्हो पंचायत वांगडी कृष्णा वेळीप आदलो सरपंच गणेश गांवकर हांका हार खावची पडली.  हे वेंचणुकेंत भाजपाची महिला मोर्चा अध्यक्ष विंदा सतरकार, काँग्रेस काणकोण महिला गट अध्यक्ष उर्सिला डिकॉस्ता, आदली पंच दीक्षा पागी, तिचो घोव दयानंद पागी हांका हार खावची पडल्या.
आगोंद, खोतीगांव, श्रीस्थळ आनी खोला पंचायतींत भाजपा समर्थकांक जैत मेळ्ळां. केंपें मतदारसंघांत येवपी खोला पंचायतींत आदलो उपमुख्यमंत्री बाबू कळेकार हांचे समर्थक वेंचून आयल्यात. पैंगीण आनी लोलयें पंचायतींत भाजपाक संमिश्र येस मेळ्ळां. गांवडोंगरी पंचायतींत आदले सरपंच आनी बिनविरोध वेंचून आयिल्ल्या धिल्लन ऊर्फ यशवंत देसाय हांच्या पॅनलाचे उमेदवार जैतिवंत जाल्यात. पैंगीण पंचायतींतल्यान सुनील पैंगीणकार आनी श्रीस्थळ पंचायतींतल्यान राजेश वेळीप बिनविरोध वेंचून आयल्यात.
गांवडोंगरी पंचायत वाठाराचे उदरगती खातीर आमी मुख्यमंत्री डॉ प्रमोद सावंत आनी सभापती रमेश तवडकार हांची मजत घेतले अशें धिल्लन देसाय हांणी सांगलां. गांवडोंगरी आनी लोलयें पंचायतींत आमचे समर्थक उमेदवार वेंचून आयल्यात अशें काँग्रेस पक्षाचो सरचिटणीस जर्नादन भंडारी हांणी सांगलां.
मतमेजणे वेळार गोवा फॉरवर्डाचो प्रशांत नायक, विकास भगत, काँग्रेसचो काणकोण गट अध्यक्ष प्रलय भगत, प्रा. डॉ मनोज कामत, भाजपाचो किशोर शेट हाजीर आशिल्ले. तांणी जैतिवंत उमेदवारांक परबीं भेटयलीं. श्रीस्थळ पंचायतींत लिविया नायक आनी तिचो देर रामू ऊर्फ धिल्लन नायक वेंचून आयला. खोला पंचायतींत अजग पागी आनी तांची घरकान्न तेजल पागी हें जोडपें जैतिवंत जालें जाल्यार पूर्णा नायक आनी श्रीनिवास नायक ह्या जोडप्याक हार खावची पडली.