काणकोणां फुकट सेवा दिवपाक तयार

भांगरभूंय | प्रतिनिधी

डॉ. मिलिंद देसायः पत्रकार संघाचें काळजां दुयेंस तपासणी शिबीर

भांगरभूंय । प्रतिनिधी

काणकोणः काळजा दुयेंस तपासचे खातीर इको तपासणी गरजेची. ही इको यंत्रणा काणकोणां बसोवची. ती बसयल्यार आपूण तपासणी सेवा फुकट दिवपाक शकता, अशें नामनेचे काळजा दुयेंस तज्ञ मिलिंद देसाय हांणी सांगलें.

काणकोण पत्रकार संघान काणकोण पालिकेच्या जोडपालवान काळजा दुयेंसाची तपासणी करचे खातीर नगर्शेंच्या आपत्कालीन आसरो घरांत शिबिराचें आयोजन केल्लें. ह्या शिबिराक मुखेल सोयरे म्हूण नगराध्यक्ष रमाकांत नायक गांवकार, सेंत्रू प्रोमोतोर दी इन्स्त्रूसांव संस्थेचे अध्यक्ष शांबा देसाय, नगरसेवक सायमन रिबेलो, गंधेश मडगांवकार, सारा शांबा देसाय, नादीन फर्नांडीस आनी हेमंत नायक गांवकार तशेंच काणकोण पत्रकार संघाचे अध्यक्ष बबेश बोरकार, उपाध्यक्ष धीरज काणकोणकार, संयुक्त सचीव बर्नाड फर्नांडीस, ज्येश्ठ पत्रकार अजीत पैंगीणकार, संतोष  गांवकार, हरिश्चंद्र खोलकार, उल्हास गांवकार हाजीर आशिल्ले. मानेस्तां हस्तुकीं दिवली पेटोवन शिबिराचें उक्तावण जालें.

इको यंत्रणा बसोवपाचे नदरेन हे आदीं भलायकी मंत्री विश्वजीत राणे, काणकोणचे आदले आमदार तशेंच सध्याचे सभापती रमेश तवडकार हांचे कडेन चर्चा केल्या. काणकोणां चड प्रमाणांत सांपडपी किडनी दुयेंतीं संबंदांत परतून संशोधन जावपाची गरज आसा. ते खातीर खूब खर्च येता. ताका लागून ही जापसालदारकी सरकारान घेवपाक जाय, अशें डॉ. देसाय हांणी सांगलें.

काणकोणकारांक अशी सेवा दिवचे खातीर फुडारांत पत्रकार संघाक पुराय तेंको दितले, अशें नगराध्यक्ष नायक गांवकार हांणी सांगलें.

डॉ. देसाय हांणी म्हयन्यांतल्यान एकदां तरी काणकोणां येवचे आनी सेवा दिवची, अशी मागणी गोंय फुटबॉल असोसिएशनाचे उपाध्यक्ष शांबा देसाय हांणी केली.

डॉ. देसाय हांचे उपकार मानून फुडारांत किडनी तपासणी शिबीर आयोजीत करतले, अशें बबेश बोरकार हांणी ह्या वेळार जाहीर केलें. संजय कोमरपंत हांणी सुत्रसंचालन केलें आनी उपकार मानले. ह्या शिबिराचो खोला, गांवडोंगरी, खोतीगांव आनी काणकोण पालिका वाठारांतल्या 128 दुयेंतींनी लाव घेतलो.