भांगरभूंय | प्रतिनिधी
रोहन खंवटेः पर्यटन वाडी खातीर मास्टर प्लॅन तयार करपाचें उतर
भांगरभूंय । प्रतिनिधी
काणकोणः काणकोण म्हालाक सैमान खूब दिलां. काणकोणच्या पर्यटन थळांची उदरत करतले. सोबीत दर्यादेगो, दोंगर, घसघशे, देवळां, चर्ची पळोवपा खातीर पणजे सावन काणकोणां पर्यटकां खातीर बशीं सुरू करतले. ताचो फायदो काणकोणकारांक जातलो. एग्रो टुरिझम, अध्यात्मीक टुरिझम हे सारकें ‘व्हिजन’ आमदार तशेंच सभापती रमेश तवडकार हांणी पळयलां. अशें तरेचें पर्यटन सुरू केलें जाल्यार ताचो निश्चीत फायदो जातलो, अशें पर्यटन मंत्री रोहन खंवटे हांणी पत्रकार परिशदेंत सांगलें.
काणकोणांतल्यो ‘दिश्टी’च्यो गाडयो बदलतले. तशेंच पर्यटकां खातीर म्हायती केंद्र सुरू करतले. पोळें तपासणी नाक्या वयल्यान गोंयांत येवपी पर्यटकांक नेम आनी अटी कळच्यो हे खातीर थंय इलेक्ट्रीक तकटे लायतले. तशेंच पर्यटकांक पुराय म्हायती मेळची हे खातीर अॅप तयार करतले, अशें मंत्री खंवटे हांणी सांगलें.
बटरफ्लाय बीच, हनिमून बीच, गालजीबाग बीच, पोळें, आगोंद, पाळोळें, पाटणें, राजबाग बिचाचेर ज्यो ज्यो सुविधा जाय त्यो पांवड्या पांवड्यान दितले, अशेंय मंत्री खंवटे हांणी सांगलें.
पर्यटन वाडी खातीर तीन पांवड्यांचेर नियोजन करतले. ते खातीर मास्टर प्लॅन तयार करतले. तातूंत ल्हान, मध्यम आनी लांब काळा खातीर नियोजन करतले. ल्हान काळाच्या नियोजनांतलीं सगळीं उदरगतींचीं कामां राज्य सरकाराच्या निधींतल्यान पुराय करतले. जाल्यार उरिल्ल्या दोन पांवड्या वयलीं कामां केंद्र सरकाराच्या प्रधानमंत्री स्वदेश दर्शन हे येवजणेच्या अर्थीक आदारान पुराय करतले, अशें मंत्री खंवटे हांणी सांगलें. हे पत्रकार परिशदेक सभापती रमेश तवडकार, पर्यटन सचीव संजीव आहुजा, संचालक निखील देसाय, खोतीगांवचे सरपंच आनंदू देसाय, भाजपाचे दक्षीण गोंय उपाध्यक्ष महेश नायक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
