भांगरभूंय | प्रतिनिधी
वास्को: काटे-बायणा हांगासरल्या उमेश हरिजन खून प्रकरणांत आयतारा बेळगांवां अटक केल्ल्या तीन दुबावितांक काल (सोमारा) पयलो वर्ग न्यायालयांत हजर करतकूच न्यायालयान तांकां सात दिसांची पुलीस कोठी दिवपाचो आदेश दिला.
हाचे पयलीं अटक केल्ल्या दीपक साहनी आनी अमीर हुसैन हांचो सात दिसांचो पुलीस कोठीचो रिमांड सोमारा सोंपले उपरांत तांकांय न्यायालयांत उबे करतकूच तांचो रिमांड आनीक सात दिसांनी वाडयला.
काटे-बायणा हांगा पांच सप्टेंबराक उमेश हरिजन (33) हाचेर पांच जाणांनी दनपारां कोयते, चाकू हांचो वापर करून हल्लो केल्लो तातूंत ताका मरण आयिल्लें. ह्या प्रकरणांत मुरगांव पुलिसांनी दीपक साहनी, अमीर हुसैन, परशुराम दोडामणी, जुम्मन शेख, दुर्गाप्पा मदार हांकां अटक केल्या.
तातूंतले दीपक साहनी आनी अमीर हुसैन हे गोंया भायर पळून वच्चे पयलींच फोंडें पुलिसांनी तांचो फाटलाग करून तांकां ताब्यांत घेतिल्ले. जाल्यार परशुराम, जुम्मन, दुर्गाप्पा हांणी गोंया भायर धांव मारिल्ली. पूण फाटले सात दीस पुलिसां पसून लिपून रावपी त्या तिगांक मुरगांव पुलिसांनी आयतारा बेळगांवां अटक केली.
ह्या खून प्रकरणांत मुरगांव पुलीस स्टेशनाचे निरिक्षक राघोबा कामत फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
